Saturday, August 16, 2008

Thil ho kawleksawn - Part 2

Thil ho kawleksawn kha in chhunzawm leh teh ang.

Vawikhat chu ka thianpa nen damlo kan buaipui a. A tlangpuiin Mizoram atanga lo kal te hi vai tawng (Hindi) an thiam thin loh avangin anni pawh chu chutiang tho turah chuan kan ngai ve ngawt a. Damdawiin a kan hruainaah chuan ka thianpa nen chuan Hindi broken deuh deuh, kan thiam chun chun thing ve fe fe chu vaiho biak nan inti thiam fahran hian kan hmang ve chen a. "Thiam min ti ve ngawt ang", ka ti rilru deuh rauh rauh reng a. Mahse a hnuah a damlo rawn kalpuitu, a nupui chu Hindi teacher a ni tih kan han hre hnuhnawh leh mai chu, zahthlak duh chem chem khawp mai. :(

Nikum Synod khawmpui lai khan ka pa phone ringtone-ah Vanlalpianga hla "Chhaste nen" tih kha ka nauten an lo dah sak pek a. Pa haihawt tih takah a switch off theihnghilh hlauh mai a, rorel inkhawm lai chuan a rawn ri ta. Chuta karah a phone ahna ipte a la dap fuh lawk thei lo zui, rei fe a zai hman a ni awm e. Synod khawmpuina a Vanlalpianga zai vawikhatna a nih mai hmel. :D

Durtlang kawng an siamthat hma khan tlai khat chu kawng kawi laiah truck nen lai angreng tak hian kan in tawk a. Ka hma a taxi driver chuan truck driver, vaipa hnenah chuan vai tawng thing lutuk hian "Chalo, chalo" a han ti ve chhen a. Truck driver vaipa chu a insum thei ta ngang lo ni ngei tur a ni, lusei tawng pai hlek lo hian, "Ngawi rawh, a la kal theih loh anih hi", an rawn ti chiah mai chu insum a har duh teh asin. :D

Kan veng a chhungkaw pakhat pawh chhung inkhawmnaah an fapa kum nga mi chu hla thlang turin an ti a. A ni chuan 'Rose par rimtui' kha a thlang tlat mai. A pa chuan, "A awm lo em mai", an ti dek dek chu a pu (naupang pa pa) chuan, "In fate thil in zirtir ngai lo lutuk a, awm leh awm lo pawh an hre tawh lo anih hi. 'Rose par rimtui' chu kan sa ang", a ti mauh mai a. Tichuan 'Rose par rimtui' chu chhung inkhawmnaah an sa ta a ni awm e. :)

Ka ni pasal pawh hi an haihawt ve laileng khawp a. Vawikhat a inkhawm hruai pawh, "Tunah chuan zaipawl", an ti chu an zai tawh tih a hrechhuak leh hnuhnawh bawk si a. "Tunah chuan zaipawl.......zai tur a kan sawm tawh avangin kan sawm nawn tawh lo mai ang a......."
:D

Saturday, August 9, 2008

Khawlum tawrh dan

Independence Day a hnai tih vang ngawt a khua an lum ta em em mai hi chu hriatthiam har ka ti ngawih ngawih. Hman deuh khan Khaw lum hi tih ka post tawh bawk a, tun tum chu khawlum tawrh dan method hrang hrang, hlawhtling taka ka lo hman thin tawh te tlem a zawng kan theh a nge.

Awm mai mai tur
Khawlum ni hi chuan awm mai mai ila a hahdam. Duhthusamah phei chuan fan / AC hnuaiah mu nileng zak ila a lum dan a nep duh khawp mai :D. Kan hnathawh pangngai leh tih tur pawimawh kan neih te tih loh hi chu ni dang a tihah khek ila a fin thlak. A bikin bazar kal, thiante in a len tih vel te phei chu kan thi dawn te a nih lem loh chuan ka dah pawimawh lo khawp mai. Tin, inah kan awm anih pawhin che sek lovin kil khatah thu ngawi hle hle ila a lum dan hi a ziaawm ve deuh chuan ka hria. Loh theih lova chhuah a ngai anih chuan tui in lawk teuh bawk tur.

Bengchhen lo tur
Khawlum leh bengchheng hi thil inhmehah ka ngai thei thlawt lo, vanram leh meidil ang vel a ni (ka tehkhin ber kher chu a fuh chiah em aw? :D) Nilo, ui leh kel thlun pawlh ang vel a ni (a la dik ta chuang lo :D) Khawlum ni hi chuan thin a chhe tel duh viau. Chuta kara bengchheng an awm leh ngat phei chuan thil hi a dik tak tak thei tawh thin lo. Rilru fim hman a har, ngaihtuahna hi a tawi deuh tup hian a hriat a. Chumi chawk khawlo zawnga rawn che an awm phei hi chuan zaidamna hian a daih tak tak tawh thin lo a ni e.

Sa ei tlem rawh
He thil hi chu scientific basis nei a ni e. 'Sa' han tih hian a bikin vawksa hi a tha lo lehzual. Sa ei hian kan taksa metabolic rate a ti sang a, chu chuan lum (heat) a siam hnem bik. I awih lo anih chuan khawlum zual ni in vawksa han ei chhin mah teh. I ei zawh atanga rei lo teah a lum zual bikin i hre ngei ang. Bakah thau (fats) lam ai chuan thlai leh thei ei hnem hi a tha hrim hrim. Khawlum ni phei chuan thlan a chhuak hnem a, kan taksa in tui a hloh (water loss) kha hnawhkhah (replace) leh ngei ngei tur a ni.

Beer vawt
Khaw lum (hic) lai chuan (hic hic) beer vawt (a mizo tawng chuan 'Chil Beer') tluka tha (hic) hi a awm dawn emaw ni le? (hic hic) Ka irhfiak nasa em mai (hic) duhtawk phawt (hic) mai teh ang (hic). :D

Monday, August 4, 2008

Vawksa siam dan : kan hostel ish-tyle

Tun tum chu vawksa siam dan - kan hostel ish-tyle kan sep rawtui dawn chhin teh ang. He thil hi khawi cooking class mah a an la zirtir ngai loh, recipe leh cook book tih vel pawh a la ziah lan loh (hria pawh ni se an telh duh kher lovang..lol), kan hostel bikah phei chuan 'inthlahchhawn thil' ni hial a kan ngaih leh kan roh em em a ni a. Hetia kan ziak ta mai hi thiante hovin pawi an ti em lovang chu maw!

A hmasa berin a ei tur zat a zirin vawksa hi lei tur a ni. Hetah hi chuan kan Assamese thianpa Bora principle, mi pakhat pum chhungah vawksa pava khat (250 grams) tal a awm tur a ni' tih hi kan hmang deuh ber. Sa chu i sil zawhah pressure cooker tawl ve tawh tak, phit tha hlei thei tawh lovah dah la, tui tlem te nen heater-ah i chhuang ang. Gas stove a herh san leh herh hniam vel hian a nih tur ang a nih tir loh theih avangin heater hi kan duh deuh kher thin.



 
A thlak pawlh tur hi a sa tam leh tlemin a hril lem lo. A variety thei ang ber cheng sawm (Rs.10) man a ni tawp mai. Purun sen pum 3-4, prun var 2, sawhthing kezungpui tiat vel, hmarcha tlem a zawng leh tomato pum 3 vel a ni tlangpui. Chu chu i chan sawm anga, newspaper hluiah a hnuai a mi ang khuan i rem thlap ang. Hetah hian 'feng-shui' tlem a tel avangin duh duh dan a rem a thiang lo. Newspaper heading khan i vawksa leina dawr lam kha a hawi tur a ni a, sawhthing leh tomato hel hi a inhlat thei ang ber a dah ngei ngei bawk tur. 
Tin, newspaper hi a nazawng hman ngawt theih a ni lo. Newspaper-ah chuan vaipa lem a chuang ngei ngei tur a ni a, chumi bul chiahah chuan purun sen chan sawm sa kha i dah ang. Vaipa lem chuang i hmu zo ngang lo anih chuan editorial page kha i hmang dawn nia. Engvang kher nge kan tih chuan, feng-shui vang a ni, tih bak ka sawi thei bik lo.    
 
Sa chu a tui a so kang vek thleng i nghak ang a. A tel a rawn chhuah a, a in er tan veleh tomato tih lo a dang zawng kha a rualin i thlak ang. 
 
Tomato thlak hun tak hi a pawimawh bawn tawp. Khatia tomato tih loh, a dang zawng i thlak veleh khan rang lutuk si lo, muang lutuk bawk si lovin i mit dinglam kha vawi thum i siai tur a ni. Veilam siai kan remti thak lo! Dinglam i siai thiam lo anih chuan vawi thum i khawng-khaw-bai auh auh thung ang. Chumi chu bahlah miah lova i tih zawh veleh tomato chu lungmuang takin i thlak thei tawh ang. 
Han chawh leh deuh bawrh bawrh pahin chi tlem i telh ang a, chuan tomato a kawi vek thleng i chhuang leh dawn nia. A mawng a kan duh deuh avangin chawh uluk a ngai. Chu zawng chu a ni mai kan chhuan leh ngaih hlut em em, kan hostel (hostel no. 4) a awm tawh phawt chuan an thiam ngei ngei tur a kan ngaih, "vawksa - kan hostel ish-tyle" a siam dan chu.