Sunday, September 28, 2008

Pikchar kawleksawn

Mi zawng zawng aia ka hawkdak bik vang pawh a ni maithei, thil maksak leh dangdai deuh hian ka mit hi a la hma khawp mai. Rem leh rem lo pawh sawi set set lo hian thla kan la ve leh thawr mai thin a. Hei, tun tumah pawh tlem a zawng ka rawn chhawpchhuak e.

He bawm, a sen a chinai tah khah luai hi engnge a nih kan hre thei mai em? Lehkhathawn thlakna bawm te pawh a ang deuh roh. Lengpui airport-a 'kang thelhna-cum-bawlhhlawh bawm' anih hi :D . Kangmei chhuak thut ta se a hmantlak a ngem le? A hnung chiahah khian bawlhhlawh bawm lian tha tak chu a awm ve tho na in, he bawm hi hman a nuam zawk pawh a ni mahna :) .



He bus hnunga inziak hi i chhiar thei em? Ferrari hian bus an lo siam thin reng a ni maw? A speed chak lamah erawh chuan a Ferrari na pakhatmah a lang lo :D .


'In kangah bungrua leh pawisa kang ral zawng zawng hlut zawng chu Rs. 2' :D . Nawrh kha an han hrat hmel hlawm asin, 'Bawnghnute Nuar Association' an din vel :D .


'Dilli Haat' zulzuia NEZCC in Guwahati a an siam 'Shilpgram' hi i tlawh ve tawh em? A changtlung ve sawt viau a nia. Mahse hei, vai hovin Mizoram food stall bangah milem an lo ziak risk pek a, a fuh chiah lo deuh. An sakei hi a khi deuh sung a, duh aiin a 'den' lo tlat :D . Tin, an pasaltha sa pel pawh khu fianrial hun hman a thiam hmel khawp mai, ngaihtuahawm tak a ni :D .


'Function Hall' chu ka hmu fo. 'Functional Hall' tak hi chu ka vawikhat hmuhna :) .


Spelling mistakes. Heng ho hi chu misual lamah pawh ka post tawh kha.






Kan ui, an hming hre hrang tawk vel a fing an nih hi :) .


A neitute min chhun a, an han mut tak tak hi chuan hmuh tlak an awm bik lo :D .


Tuesday, September 23, 2008

Ngaihtuah zui atan

Sawhthing hralh harsat chhan
Guwahati-a kum li chuang ka awm ve tawh chhung hian sawhthing hi kg khat cheng sawmli (40) aia a tlawm ka la hre lo. Cheng sawmruk (60) a kai chang pawh a tam mai. Hetia Mizoram thenawm state Assam-a a man a sang em em chung hian ‘sawhthing hralhna a awm lo’ tih a ni reng bawk si hi mak ka ti thin khawp mai. :( Hemi chungchang hi Agriculture Department-a thawk ka patea ka ti ti pui a. Sawhthing hralh hi a harsat chhan tam tak awm mahse, a bulpui ber chu, ‘Mizote kan rinawm tawk loh vang a ni’, a ti tlat mai. Rinawmna leh sawhthing market hian engnge inzawmnna an neih le? :)


Ka patea sawi dan chuan, “Sawhthing lei tur hi an awm lo pawh a ni hran lo, company lian tak tak pawh an rawn kal fo. Mahse heng company ho hi chuan mumal tak a thil tih an duh thin a. An sawhthing lei tur reng reng hi a that dan (quality) a zirin ‘grading’ an siam thin. Entirnan, grade sang chu a quality tha hlang, a man pawh to ber tura ngaih a ni. A sawngkawn deuh ho chu grade a hniam anga, a man pawh a tlawm ang. Hetah tak hian kan rinawm lohna a lo lang a, a tha zingah a chhia kan lo pawh ruk duh zel thin avangin min dawrtute kan hnar a, min dawr chhunzawm zel an chak thlawt lo a ni”, a ti. Dik tak maw? Keichu thil ni thei niin ka hre deuh roh! :)

Medal nge pawisa?

Hman deuh khan kan sports minister zahawm tak hian, “Mizote hi football-ah kan than a kin tawh”, a ti tlat in ka hria. Hei hi engvanga sawi nge anih aw? :( Mithenkhat chuan pianphung ngaihtuahin fooball ai chuan combat leh individual sports (boxing, judo, wrestling etc) lam hi bei ngawrh ta ila, kan thlen san zawk an ring. Hei vanga sawi pawh hi a ni maithei. FIFA ranking-ah India a lo sang em em bawk lo nen, a dikna chen pawh a awm ve tho mai.


Heti zawng hian in ngaihtuah daih chin teh ang. Kan infiammite hian national leh international level thleng pawhin medal dawng del dul mahsela chhungkaw chawmna tur pawisa in a zui chuan si loh chuan engnge an tan hlawkna? News a ka hmuh hmeichhe pakhat (Orissa a mi ni ta in ka hria) lawngkar (rowing) a Asia champion nihna te pawh lo hauh thin tawh chu sum leh pai harsat vangin police constable laknaah a intlar ve tawp ringawt. :( Hei vang tak hian infiamna thekhat hi chu sawrkar in a infiammite a chhawmdawl zel loh chuan hmasawn zel a harsatna lai a awm.

Chutihlaiin kan professional footballer te hi sawrkar puihna tel mang lova tun dinhmun thleng thei hi an ni fur tlat. Subroto Cup etc vela an zinna bak kha sawrkar pawisa an tih hek zui ka ring lem lo. India aiawha vawi duailo lo feh chhuak tawh boxer Jenny ai chuan, India senior team a vawikhatmah la khel phak lo S Malsawmtluanga bank account hi a hrisel ka ring zawk mah (ka ring diklo thei tho bawk :) ). Chuvangin ‘medal’ hi ‘pawisa’ in a zui loh chuan hlutna a nei vak em ni?

Ngaihsam
Thutak run zawng hriselna in a lo ngeih lo palh ang, a tawp nan fiamthu :) . Ka ni te inhnuai luahtu vainu khan a rukin bialpa a lo nei ve a. An pa zin hlanin a bialpa chu a lo kal thin a ni awm e. Vawikhat chu ka ni in a lo hmu fuh a, a hau ta. “Pasal nei lai anih hi, lo kal lo kal tawh lo la a tha ang”, a tia. Vaipa chuan, “Ka pi, aman duh chuan pawi lo”, a ti sam ve at. Ngaihsam viau lo maw? :D

Tuesday, September 9, 2008

Chawhchawrawi

Kan ram thanmawhbawk dik tak
Patling-a-pumpa, kawl a ni chhuak chiara thawkchhuak ve ziah, ram leh hnam tan a thawktu in ti ve si, party pisa-a khuang beng a mihlim zai nileng leh ringawt thin ho hi kan ram thanmawhbawk dik tak chu in ni e, ka ti ve tlat! Nangni ho hi alawm thawh loh hlawh lak tum a, contract hna in hmuh apiang a tam thei ang ber hlep tum ziah a, sawrkar hnathawk tur an lak dawn apianga political fitness in neih vang liau liau a midang kawng dal thin tute chu. "Tunlai thalaite chu an chu e kha e" min ti ve khanglang maw? Kei ai hian ram leh hnam tan in hlu bik chuang hauh lo. Vote khat nei theuh theuh :D ! Party ruihchilh in bansan a, kut tling lova sum leh pai lakluh hi zah nachang in hriat a, mithiam leh tling zawkte kawng ken nachang in hriat hunah hma te chu kan la sawn ve mahna...

Speed Demons
Hmanni tlai khan tuirial kawngah tlangval hawklak kawngpuia bike intlansiak hovin kan u, bike a zin chhuak tur an lo su pek a. A khingkhangruh dinglam (clavicle) hmun hnihah tliakin tunah hian damdawi inah a la awm mek. A su tu pa pawh hi khum betin a na ve hle bawk. Bike a intlansiak ching ho hi an hnawk ka ti khawp mai. Kar khat vel bawr liam ta mai khan Durtlang kawngah chak lutuk tak maiin pahnih hi an rawn in um chhova. Kawng kawi lai takah taxi an rawn overtake a, ka car brake ding hman lo ila chuan kan insu chiang viau ang. A na tur zawk ka nilo tih kan inngaihtuah leh hnu hian ka lo su thal tawp lo a ni aw :P

Heng kan tlangval tih tur nei lo (nge ti peih lo??!) ho bike lei saktu nu leh pa zawng zawng te u, in fate bike in lei sak chungchangah hian sawi theih pakhatmah ka neilo niin ka in hre thin, ka siki them pawh ka thawh miau loh avangin! Mahse midang tana hnawksak an nih mai bakah, kan pawi an khawih takah chuan sawi ve tur chu ka neiin ka hria. Hman tangkaina tur awm miah lova in fapate lirthei leisak hi engnge a tulna aw? Nge intlansiak tur hrim hrim a tuai hriam in duh :D ?! Chuti a nih si loh chuan khuahkhirh ve deuh teh u, mi pawi an khawih leh hma hian. Tin, ka tlangval puite u, chawmhlawm in la nih chuan inthlahrun nachang hria ula, in speed han ti hniam ve deuh teh u khai.

Hmeichhiate u, lawm ula; Mipate u, lawmthu sawi rawh u

Kar hmasa khan kan vawkpuiin no a nei leh a, a vawithumna a ni ta. A hmasa tum hnih kha chuan pakua ve ve a nei a, mahse tun tum chu a zak deuh nge mawni, pasarih chiah a sang chhuak. Nau chharnaah hian ka va in bawrti ve a, mahse a puiin min lo ngaina aw zawng lo mai. Kei aiin tualchher nau chhar thiam ka nu a ring tlat zawk kha chu ka la na ve lek lek. :)


Ti hian ka ngaihtuah ta a. Hmeichhe ho hian vawikhat raiah hian pakua te hi han pai ve thuih mai ula a buaithlak duh awm. Nau vei lai / nau nei lai hi ngaia nei tur khawpa tam ka hmu ve ta. Nula lam chuan in la hrethiam chiah lo maithei, mahse pakhat lek sang chhuak tur pawh hian thih tha a tan lak tak meuh meuh a ngai ania. Harsa tak a pathum san chhuah hnuah pawh, "Tang rawh, tang rawh, a tam berah panga bak an awm tawh lovang", tiin a mawng lam atang hian nau chhartu hi rawn au lauh lauh mai sela chuan a manganthlak duh viau ang. Nau pakhat lek lek (phir te chu awm ve zeuh zeuh mahse) a in pai thin avang hian hmeichhiate u, lawm rawh u! Tin, mipate u, nau pai tur zawka Pathian serh hran in nih loh avang ringawt pawh hian lawmthu sawi mawlh mawlh teh u. :D

Khanghu kung atangin ka tla lo
Ka unaupa RTPA zarah insawifiah a ngai leh ta tlat mai. RTPA hian an nu aia chungnun zawkna pakhat chiah a nei; chu chu a thu zep theihlohna hi a ni. Thil ri deuh feih feih a lo hriat laklawh tawh hi chuan khapbeh zawh rual a ni lo. A zeldinthubawlna thluak chak tak mai hian amah mai bakah a bul vela mi te hi a lo phul pui leh chiam thin. Mahse hei vang ngawt hian thaibawih chu kan ti bik miah lo. Rawngbawlte chu a tet lai atanga nuam a tih tawh ania, insukte pawh hi hun awl hnawhkhahna tha tak a ni tih a hriatna a rei tawh. Inchhung phiah faite lek lek, hriselna in a ngeih rapthlak. :D

Awle, khami ni a thil thleng dik tak chu hetiang hi a ni e. Huana chingit kung ka zawng chu lamkhuang tawih rap palhin ka tawlhthlu hlauh mai. Ka tlukna lamah nimbu kung ka delh a, kawr ka lo ha silova, a na duh khawp mai. Kan kawmthlangte pawnah awm lo phei sela chuan ka te chhuak chiam ang. :)