Friday, July 31, 2009

Dimapur zin report

Ka cousin te chhungkua, Asha Bhawan, Dimapur Branch enkawl a awm mek te tlawhin Dimapur lam ka han zin ve e ka tia. Ni 29, nilaini zing dar 6:30-a chhuak Jan Shatabdi Express nan hman tumin dar 5-ah alarm clock kan set ve na a, a ngai te bawkin mumang nen ka lo hmet hlum leh daih pek chu niin. Dar 6 rik dawnah ka harh hlawl a, hmanhmawh bak lengin rel station lam panin ka thawkchhuak nghal a. Chu ka thawh tlai man chu chawp leh chilha tel nghalin, ka u in a fapa zirlaibu tur min chah, ka lei sa diam chu kan theihnghilh zui bawk a.

Chawhma dar 11 pelh hretah Dimapur kan thleng a. Kum thum kal ta a Diphu kan zin tum, chhuk nachang kan hriat tak loh nen a chhiar chuan, Dimapur leilung ka vawihnih rahna a ni ve ta.

Rel station-ah hian ka hawi kual vual vual a, vai ka hmu hnem na ngang mai. Mizoram sorkar dinglaiin Sairang thleng a rel luh tir a tum chungchanga a duh lo pawl ho rilru put hmang tur pawh ka hrethiam ve ruai ruai. Mahse kan ngaihtuah chian deuh hnu chuan, chimral kan nih leh nih loh chu keimahni, a leilung neitute kutah a innghat thuk hle in ka hria. Rel a rawn lut ngat anih chuan min chimral tu turte chu vai lehkhathiam pui pui, sumdawng hausa leh officer lian tak tak te an ni hauh lo. Aw mak tak tak a "Chaaaiiii...garam chaaaiiii" leh "Pani botol, pani botol" ti a au lauh lauh chunga eizawng tute leh an thlahte hi min chimral theitu turte chu an lo ni daih mai. Hetiang hna hi kan thawk zak a, kan thawk duh lo anih chuan vaiho tan kawng kan hawng mai mai dawn tihna a ni. Rel station leh a behbawm a hna awm thei ang tur zawng zawng keimahni ngeiin kan lo hma khalh vek chuan hlauh tur a awmin ka hre lo, kei ve te hi chuan.




Chawhmeh leiin bazar kan lut kawi zawk a. Kil tin maiah hian chawhmeh hi an lo phu suau suau a, a then lah an lo sawt deuh tawk tawk bawk a.




Lunch te kan ei zawh chuan muangchangin farm lamah Inkhawm turin kan thawkchhuak a. Asha Bhawan-a an mi enkawlte hi Pathian thu hmanga an hruai bakah, mahni a intodelh dan tur kawng an zirtir nasa em em a, hna pawh an thawk nasa khawp mai. An farm hi khaw pawn deuh hlek a awm, Vidima Village-an tih hmuna awm a ni. An enkawl uluk bawk a, a thianghlim hle.






Ran chi hrang hrang - vawk, kel, sazupui, varak leh parva an neih bakah sangha dil lian lutuk lo an siam tel bawk.








Thlai leh thei lam pawh an intodelh viau. Ka hmuh theih chinah chuan - balhla, lakhuihthei, thingfanghma, vaimim, bawkbawn leh bawrhsaibe.








Tlai dar 6-ah inkhawmna hun kan nei. A boruak zangkhai zawngin hun an hmang a, zaiho leh tawngtai rual an uar hle. Sermon tawi fel tak mi pahnih hnen atangin kan ngaithla a. Hindi-a thu an sawi chuan English-in an let nghal zel a, English-a an sawi pawhin Hindi in an let ve nghal zel bawk. Inkhawm hun chhung hi minute sawmli vel bawr ni ta in ka hria.



Inkhawm banah chawhlui kan kil ho nghal a. Farm lamah hian mipa ho chauh an awm avangin rawngbawl lamah an ropui lutuk bik lo. Chaw an khawrh teuh a, arsa tlang li theuh, lian leng lawng, tui nei a kan leh chi kan hmeh. Mahse kei chu ka duhthusam a ni tlat thung. Chawhmeh a tam lutuk hi chuan ka chaw ei a ti buai vek zel. Chu ai chuan chawhmeh pahnih khat lek hi khalh fal ila nuam ka ti zawk. Chaw ei hma hian tawngtai turin min sawm thut a, kan chham pual ve nghek kha. A tla tha ve viau chuan ka hria.




Army Wives' Welfare Association lam atangin tanpuina tam tham tak an dawng a, hei hian hmeichhe ho awmna tur in an sak belh mek. (Dimapur center-ah hian hmeichhia an la awm meuh lova, a awm chhun te pawh ka u te hnenah hian an khawsa ve naw naw hrih a ni).


He naupang hi a hming chu Vishal a ni a, a pa hi drug addict, HIV positive a ni. A tirah an chhungin Asha Bhawan-ah hian an lo lut a, mahse a pa hian a tlan bo san tak daih avangin a nu nen an khawsa ve mek. Vanneihthlak tak maiin Vishal-a leh a nu hi an positive ve lo. Vishal-a thil awh ber chu guitar lem a ni a, an tawngtai rual apiangin an dil sak ve ziah thin. In hriatchhuah chang changin in tawngtainaah in lo hre ve thin dawn nia.