Thil ho kawleksawn

Nizan ka lehkha zir chu ka hlawk lo hle mai. Darkar thum chuang ngawt thil ho tak tak ngaihtuah in ka hun ka khawhral a. Ka zirlaiah nuihzathlak a awm loh teh reng nen, lehkhabu bih ngur ngur chungin ka nui leh tut tut thin. Ka 'concentration' that lohna lamah hian ka 'concentrate' thei ang reng fu bawk si a, tangkaina a nei tam lo khawp mai.

Ka thil ngaihtuah chhuah te chu tlem a zawng kan thai chhuak chhin teh ang.

• Kum sawm chuang kal ta khan ka nu nen West Phaileng a kan ram / huan en turin kan kal a. Kawng laklawhah ka ek a chhuak ta tlat mai. Ip reng thei ta lo chu inthiar turin kawng thlang lamah ka liam thla ta. Remchanglai ni a ka hriatah chuan tan hmun kan siam rem a, kan e tan ta. Mahse rei pawh a ral hmain thil engemawni hian na lutuk in ka mawngtamah tak mai chuan a rawn seh ta thut mai, thluak hi a fan cho nghal raih raih hian a hriat a. Kan en chhian nak chuan taivang bu hi ka lo ek khum chu niin, ka inthiarfihlim rang teh asin!

• Nikum kum hlui thlah zan khan nula pakhatin an thiante in a hmang ho tura min rawn sawm ve mial avangin ka thianpa nen kan thawk chhuak ve a. Motor park-na tur a rem vak loh avangin gate bulah, motor dang chhuahna tur dal tawk vel chiah hian ka dah a. Zing darkhat rik dawnah chuan min sawmtute chu haw an duh ta. An motor chhuahna tur ka dal avangin ka motor dah sawn kan tum chu chahbi ka hmu zo ta reng reng lo mai. Anni an hmanhmawh tawh bawk si, kei lah in a ngaihna ka hre tawh bawk si lo. Tichuan motor tukverhah chuan ka va dak dek dek a, ka hlauh ang ngeiin chahbi chu a chhungah ka lo kalh hnan a. A chet 'scoring' loh theih tiah tiah khawp mai.

• Pa haihawt leh mi hai ching tak ka nih hi ka pha hauh lo, chhun tur ka nei tha em bawk a tin a ni! Ka pa pawh vawi khat chu lungphunnaah a kal ve a. Hunserh an hman zawh chuan chhungkaw nu ber (a lungphun tu nu ti mai ang) chuan a rawn chibai a, ka pa chuan in ti bengvar fahran hian, "I dam maw? I lo kal ve thei a ni maw", an ti hah maiah!

• Ka pi (ka pa nu) thih kha ka hre pha chiah lo nang a, thil nuihzathlak tak mai an sawi hriat reng ka la nei. Pu Kawla (Late, Chhama pu) damdawiin a inentir haw lam hian a rawn ral ve a. A kekawr ipte a zen mual mual a, a inentirna payment receipt chu pawisa emaw tiin ka nu kutah a hlan ve zan. In a thlen hnu chuan a han in hrechhuak leh hnuhnawh a, a receipt chu cheng 50 in a rawn thleng leh a ni awm e.

• GNRC Hospital-ah damlo riah pui ngai an awm tumin U Joseph-a nen zankhat chu kan va thawkchhuak ve a. A damlo ICU-a a awm daih avangin visitors lounge-ah kan thu tlaivar thak a. Khawvar dawn lampangah ka ek chhuak chuan mi a tur tan ta. Ham bui bui chung chuan ek in lam ka pan phei a, a ruak zawk ni a ka hriatah chuan kan lut ve tawp a. Mahse a ek bel chuan mawng hi a khuap zo tlat lo, te deuh riau hian ka hria a. Ka e kham kawngka kan hawng chiah chu nutling pahnih hian mak tih hmel fe hian min lo en a. Kawngka khar pahin "LADIES" tih inziak kan hmu thut mai chu ka phu chiang mai mai a nia aw!

• U Joseph-a hi hnathawk tawh, in luah a awm ve a nia. A in luahna bul lawkah hian kan thiante tho, nula pahnih lehkha zirlai hi an awm ve thin a. Khaw lum zual laiin zan khat chu current a awm lova, an mu thei bawk si lo chu nula pakhat zawk nen chuan an in bul kawngpuiah chuan an vei chhuak mai mai a. Gate a an lut leh tur chu police patrol ho in an rawn hmu fuh ta, engmah pawh sawi hman lovin an gypsy-ah chuan an nam lut nghal nawk nawk a. A tuk zing khawvar rualin an rawn chhuah ve leh ta thova. "Eng case in nge an man che u?" ti a kan zawh chuan, "Mi hur case in", an ti lauh lauh thin.

• Guwahati hi a bikin zan lamah police ho an strict zual deuh avangin fimkhur a ngai khawp mai. 2006 World Cup lai khan kan thiante pahnih, mi in a en tura an kal pawh police in an lo man a. Inkhel en tura an thiante in a kal tum an nih thu an han hrilh chuan police ho chuan, "E, chutia inkhel in en duh te chuan thana-ah TV kan nei alawm", tiin thana lamah an hruai phei a. Black & white TV, a hmai kutphat tiat vel a hlai hi lock-up bar phen atangin an en tir ve a ni awm e.

• Kan sande sikul zirlai sawihonaah vawikhat chu pa pakhat hian an sawi pawlh chiang mai mai asin. "Isua pian hun lai a beram pute pawh kha an lo fing awm teh e. Arsi an hmu a zui ngawt nachang an hria te kha a mak ngawt mai", an rawn ti ve ngawt pek a. A sawi pawlh/sawi sual tih a la in hre lo zui. Upa pakhat in a rawn tlip mawi sak ringawt.

• Thla hmasa atang khan MST chuan Guwahati-ah AC Bus a tlan tan tir ve ta. A chuan man pawh a pangngai ai chuan a sang deuh . Mahse (mahse tih ziah a ngai hi a hahthlak) duhthu a sam lo khawp mai. Bus te chi a nia, keini ang palian deuh chu chuan a hahthlak dawn tlat. 'Ho ber of the year' chu hei hi a ni e - a driver in AC a ON tha duh lo! AC ON chuan bus a tlan chak thei lo a ti. Lolzzzzzzz.....
  

Kar hmasa khan ka khawlah hrik a lut ve a ka buai phah hrep. Ka tih thin angin weekend-ah pawh ka post hman ta lo. Tin, thla tharah exam ka neih dawn avangin hei bak chu ka post tawh hrih lovang.