Khaw lum hi

Kan Pa, vana mi hnenah hian malsawmna leh mawmawh tinreng dilin ka tawngtai kur ve duah thin. A pangchang pawl tak pawh ka ni hial ang. Dil loh a lawi hi ka nei tawh mang lova, inthlahrun nachang lah ka hre hek lo. Khaw tha tur pawh hian ka dil ve fo, mahse hetiang em em a khawlum tur hi chuan vawikhat mah ka la dil chin ngai lo thung. Anchhia anih loh vek pawhin malsawmna han tih chu a harsa lam deuh a ni.

Khawlum leh thau
Thau hi mei alh a i rawh chuan a sawr fai vek ang. Rawh chiah lova i ur erawh chuan a mawm a rawn chhuak sur sur ang a, a tlawrh hlup ang. Hei hi sarep principle chu a ni. He principle ngei mai hi khaw lum chhung zawng hian duh leh duh loh pawh thlan theih lek lovin keimahah hian apply in a awm ta thin a, intih-sek-siak a tel tur a mawi khawpin ka tliang hlurh zel. Chu chuan hmai a ti bawl duh zek lehnghal a, inlak mitak hnu a hmai han bawl leh kher kher hi chu a ngeiawm hranpa ve hrim hrim.

Ka pian tirhin naute chum beng buang ka nih thu tuma’n an sawi ka hre lo. Chaw lah vantlang chunglam ei bak a hrisel leh tha ei thei tur khawp a hausa kan ni bawk hek lo. Mahse hei hi chu ka chiang. Ka ei apiang hi ka ngeih em em thei zel. Malsawmna chu a ni chiang. Mahse mihring famkim lohna a lo lang a, a vawksa heh hehah ka la tang zui. Insum theih loh luatah hriselna in a tuar lo chauh thin. Baptistu Johana’n khaukhuap leh kawizu ringawt chaw a a rin ang deuh khan samtawk chum, fanghma leh tuisik ringawt pawh hi ring ila, ka thaupui thei tho vang.

Khawlum = rimchhiatna
Khawlum zual lai chuan thlan hi zun aiin a let engemaw zatin in a tam. Hei hi hriselna atan a tha a, mi pangngai chu an vun a lo engin an ngo phah suah thin. Keiah erawh hi chuan a hna thawh dan a letling leh hlauh thung. Thlan ka ngah poh leh ka vun in thim lam a pan a, hriselna lam aiin rimchhiatna ka lansarh pui zawk tlat thin. Hei hi mi ka an lohna nge, midang aia ka chungnun zawkna pawh ka hre tawh bik lo. Vai ho vun hil bul han hmuh hi chuan an hnar a han sawk sak nghek mai te hi ka duh thin.

Khawlum sexy lo
Khawthlang lamah chuan an khawlum (summer) lai hian beach-ah te leh hmun hrang hrangah an awm ‘sexy’ sup sup thin. Khawlum leh sexy hi mi tam tak chuan kan thlunzawm sa ve hrim hrim. Sexy-na hmanrua hi pawimawh tak tak a awm. A hmarua a zir hian mi an sexy in an sexy lo thei. Hetah pawh hian kei mi piang dangdai ta ngang chu a danglam leh tlat. A chhan kan sawifiah ange.

Khawlum laia ka taimak ve na tak chu inbual hi a ni. A dik tak chuan ka rimchhiat miau si chuan taimak ngawt loh chu tih theih dang ka nei lo. Inbual ngun chuan kekawrte kan su ngun lo thei thin silova, a hek duh pap pap khawp mai. Suk ngun na na na chuan a rawng a da chakin a mawng a pawp thuai thuai a, a pawhfan (elastic) lah a rul duh em em mai lehnghal. Hei vang tak hian han in phelh sexy ngawt chi pawh ka ni lo. A ‘vaw hawt’ tu tur ber a lo chul deuh rup si chuan sexy a hnekin tawphnawk lam ka pawl mah mah zawk dawn tlat. Thil hmunawm tak leh hmuh nuam tak anih ka ring miah lo. Han ngaihtuah ve chin mah teh, ka kekawrte a ‘TARA’ tih inziak aiah khan ‘TARARA’ tih a lo nih loh vek pawhin, ‘A’ hi a lo karful tawh maithei tlat. Chuvangin khawlum lai hi chuan sexy ve loh hi ka mawipui zawk a ni e.

Thlarau nun a khawih
Phai khawlum hrehawmzia lanchhuah lehna pakhat chu inkhawm lai hian a ni ngei ang. Awm mai mai pawh a a uap tih tawh nak alaiin, inhmuam uap chawp an la ngai leh bawk si a. Muthlukna thlarau a rawn thawh tawh chinah phei hi chuan thlarau nun hi a tlahniam lo thei thin lo. Sermon sawi tawi apiang hi thu sawi thiam an ni ringawt mai a, ka mutthluk hma a thlarau nun chawm thei thil sawi zo hmasa apiang kha ka hlawkpui. Siamtu pawh hian mi a hriatthiam ve deuh te kan ring thla ve leh ngawt thin a, a lo nih loh hlauh phei chuan ka chan a chhe ngawt ang le.

Kum 2001 atang khan hostel-ah ka la awm char char. Chuta ka thil chin chhuah pakhat chu, light awm loh rual rual a theihpatawp a khek vak hi a ni. Khawlum a tih nawm phah pawh ka hre chuang lo, anihna takah chuan zual zawk awm tak a nia. Mahse han khek chiam mai khan chhung lamah hian nuam tih veng vengna leh thawven hawkna min pe thin. Inkhawm laia light a awm loh thuh hian kha kha a tih theih ta thin silova, mi hi a rawn hnawh up up a, ka puak keh lo chauh thin.

Thatchhiatna bulpui
Mahni tawk a zawi tawh nak alaiin, khawlum in mi an sawisak leh ngat phei hi chuan hmuhtlak hi ka awm thlawt lo. Chuatah a tleng hian ka tleng lo chauh. ‘Thawk lo chuan ei pawh ei suh se’ tih kha zawm tak tak tur phei chu nisela, tam hlum hmasa ber ka nih loh vek pawhin a dawttu tal chu ka ni hrim hrim. Eng anga nasa pawhin ni khi han in sang phek mahsela, mutchhuak lem lo pawh hi ka hnungzangin zawl a deh tawh chuan ka chatthla thei mai zel. Hei hi ka talent dawn tam tak zing a mi, eizawn nan a hman tlak chuang miah lo a ni. Han peipun leh ngaihna pawh a awm tawh chuang lo.