Thursday, March 19, 2009

Thlalak hlui

Ka pa computer-ah he thlalak hlui hi ka chhar nawlh mai. Ka pu Rema (Lalrema Ngente, ka patea pa) tih loh hi chu mimal taka han hriat em em pawh ka nei chuang lo. Hmang tangkai duh emaw, lo kawl tha ve duh hrim hrim te in awm takin, tih thil thuah ka rawn post ve mai mai a ni e. Ka lawm e!

Wednesday, March 11, 2009

Eng kan ti nge?

Politics lam hi khel tawh loh hram ka duh. Mahse kan hotute che vel leh khawsak duh dan hmuh hian lung hi a awi thei thin ngang bawk si lova, vawikhat na na na chu duhthu han sam khum leh poh teh ang. Tin, party support bik ka nei lova, mahse mimal takin duhzawng leh ngainat zawng chu ka nei ve bawk, tih hi kan zep tel hram bawk a nge.

Home Minister Pu R Lalzirliana chuan, hmeichhiate zahawmna tihbawrhbansak ching an awm fo chu a ngaihmawh thu sawiin, tun hnaia zaithiam pakhat sex video hmanga tihmualpho a nih chungchangah, a bul tumtu chu chhui chhuah a hrem a nih dawn thu a sawi.
Source : Vanglaini (March 10, 2009)

Pu Zira hian min hre tawh kher lovang, mahse kei chuan ka la hre ve kar. Kum thum kalta khan Guwahati-a Mizo sumo accident a awm tumin damlo buaipuiin damdawi in leh Mizoram House-ah kan inzui kual hrep tawh. Khami tum khan a thawk thain, kei leh ka thiante chuan kan fak khawp mai. Tin, opposition bench a an thut lai pawh khan TV-ah a thusawi leh chevel ka lo hmu fo tawh a, kan politician ho zingah chuan mimal taka ka tan pawl tak a ni nghe nghe.


Mahse he sex video chungchanga a inrawlh hi engnge a tulna aw? Minister meuh inrawlh nan chuan nep ka ti deuh. Ram hnuk a hlat em mai! Nge political gain leh intihlar nan hrim hrim a hmang zawk? A enga pawh chu nise, ho ka la ti ngawih ngawih tho.


A hmasa berin he thil hi chhuichhuah a har ka ring lova, minister in press ho hma a thuchhuah a siam a tul hek lo. Video a langte hian an hmai an tuam lova, an bibo daih bawk hek lo. Tu te nge a nih tih chu mi zawng zawng hriat sa. Anmahni hi thu zawhfiah mai tur a ni dawn lovem ni? A mipa hi a lo bi bo daih anih pawhin, a hmeichhia hi zawt sela, man a har tawp lovang. Tichuan he buaina, Home Minister ho meuh a kan chai rawn luai luai hi a tawp der anga, hna ropui deuh hlek zawk kan thawk tan leh vat thei mahna!
Pu Pachhunga chuan, Pu Hawla sorkar chuan MNF ministry-in Saitual, Khawzawl leh Hnahthial district a lo pek ve te chu chhunzawm dan hre lovin a en liam mai mai dawn nia a lan thu te, Lammual stadium sak tur pawh chhuanlam dawrawm tak tak siamin hlamchhiah a tum thu te, New Capital Complex-a governor chenna tur sak tawh pawh sorkar hmasa thiltih zahna nei miah lovin High Court hmun atan an thlak mek thute a sawi bawk a. Kolodyne Hydel Power Project, Delhi Mizoram House, Tennis Court chhuatphah tha chi, damdawiin nau neihna building thar tur, Refferal Hospital Medical College te chu MNF Ministry in a lo tihfel vek tawh an nih thu a sawi bawk a.
Source : Vanglaini tho (March 10, 2009)


Indian democracy a politician an ni a, opposition bench a an thut miau bawk avangin he thusawi hi mak ka ti hran lo. Mahse Mizo kan nihna leh Kristian kan nihna atanga thlir chuan tul ka ti lo hul hual. Vaiho politics khelh dan hi i entawn duak duak lovang u.


A hmasa berin, kum khat em pawh a tlin hma a sawrkar thar sawisel chiam hi a la hma lulai deuh lo maw? Hun te in pe ve bawk ta ila, chuta an hnathawhin duhthu a sam lo leh pek anih chuan kan chuk rawn leh luai luai dawn nia. Ka thil chak zawng tak alawm.


'Medical College' tih khi engnge a awmzia ni ta le? MNF ministry hun lai khan Refferal Hospital mai nilovin Medical College tur thlengin an lo tifel diam tawh tihna maw? Tak tak anih vaih chuan ka thil hre lo lutuk hi ka zak chem chem. Avang chu ka hriat ve chinah chuan, Refferal Hospital khum 300 awmna tura ruahman kha MNF Ministry chuan khum 30 (?) awmna turin, famkim lo takin an peihfel thei hram, tih kha a ni si a. Mak thin ngei mai.

Tin, Delhi Mizoram House thar, tennis court chhuat phah tha chi tih te khi sawi chhen a tul lem lo. Lengpui Airport hi Congress ho kutchhuak a ni tih kan hriat ang bawkin Durtlang kawng pawh MNF ho siam a ni tih kan hria alawm. Zoram mipuite hi in hna thawh that leh that loh hre hrang lo tur khawp a mawl chhah chu kan ni bik lo ania auh.

Pu te u, in thu khel hi a nawi thin mah mah deuh lo maw??!!

Tuesday, March 3, 2009

Shillong zin report

Tunlai chu thluak a chau rih ani maithei, thu ziah deuh duahna thlarau ka tlachham tlat. Thlalak hi in dah leh tuar phawt mai teh ang. A lehpek atang chuan thu ho tak tak, tangkailo leh hmasawnna awm miah lo kan thutak khukpui leh ngheng theih tawh ka beisei.

RTPA a.k.a. 'Tluang-bawma' leh a fapa 'Chur-chuh-puia'....


An nu chuan, "Mipa pawh ni mah la engkim thiam vek tur. Rawngbawl thiam leh inchhung phiah fai ringawt hi a tawk lo. Nau ek tihfai chenin i thiam vek tur a ni", tih pah chuan a vin deuh hlawk hlawk a. RTPA chuan engmah sawi ngam hek lo, thiam ngei tumin uluk takin a lo thlir doh doh a.


A thlahtute a chhun a, a hmel en aiin a tap uar ve thei zek.


RTPA pawh a dul a lian sawt khawp mai. May thla tawp lam khi chuan a neih ve tawh mai kan beisei.


Sarzuk. Chilthli tla duah duahin ka thlir reng a. "Lo rawh u" an tih hma kha chu ka lo ngam chiah si lo. "Lo rawh u" an han ti chiah mai chu a kung ka bawhthlu lo chauh.


'Mai lam zir chiang mi' ka nih loh avangin a ban leh ban loh ka hre hauh lo. Risk ngaihna pawh ka hre lo.


Hei hi chu he post nen hian inlaichinna a nei miah lo, bonus vel mai mai anih hi. Tunlai hian ka hmeh ngun hle. Chaw vawikhat eiah 'strip' khat leh a chanve vel ka ei thin tlangpui.


Thutak : Ka unaupa duhtak RTPA, Pathianin mihring a siamchhan pawimawh ber te zing a mi pakhat i hlen chhuak ta der mai. Ka lawmpui tak zet che. In nupa in Pathian awmpuina in dawn a, Kristian Chhungkaw nghet tak in din chhoh theih nan duhsakna sang ber ka hlan a che u!