Te-vawk

Ka nu vawkpui note an nih thip thep hi. Chawlh chhung zawngin an in sa ha in ka hmanhlel a, ni a sa bawk sia tha a heh ve khawp mai. A neih hmasak zawk chuan an thi fai vek a. Tun tum chu 9 an dam a 1 chiah a thi..Ka nu in chaw a pek laiin '1500, 3000, 4500' tih pahin ka lo va chhiar kual zat zat, min hau hrep..Hetianga lo chhiar lawk hi pipute hun lai atang tawh khan an lo duh vak lo a ni awm e.

Vawksa hrim hrim hi Mizote hian kan duh hliam hliam khawp mai. A hrisel leh hrisel loh chu thudang lo ni ta se, per capita income atanga chhut a vawksa ei hnem ber kan ni mai ang a, te ka ti mai mai a. Tunlai hian vawksa kg. khat cheng 140 a ni tawh a, a no pawh hi cheng 2500 in an hralh tlangpui. Mahse a pian tha deuh leh lian deuh te chu cheng 3000 chhiar tlat te pawh an awm. Heti tak a vawksa heh, a man leh note to chung bawk si hian, han hlawkpui em em leh han hausakpui lawih hi sawi tur ka hre mang chuang tlat lo. Nge a hlep tur nen lam kan ei zo vek?