Monday, March 17, 2008

Guwahati to Aizawl service

Zing thawh hai atang bawkin bul kan tan leh chu! Dar 8-a thawh tum kha dar 10 rik dawnah ka harh thei chauh a, a tlai a tlaiin University lamah thianpa bike hawhin ka tlan phei nghal a. Vanneihthlak takin ka tih tur ang ang awlsam te in ka ti zo thei a. Hei hi Gauhati University-ah chuan thil vang a ni. Mahse kal chhung hi a rei hrim hrim avangin chawhnu dar 1-ah hostel ka thleng phei leh hman hram chauh. Ka lo insiam lawk bawk si loh avangin rilru a buai duh hle. Ka hmuh hmasak apiang ka ipteah ka vawm lut a, lunch ka ei thuai thuai a, tichuan Capital Travels bus station lam autorickshaw in ka pan phei ve leh ta rawih mai a ni.

Ka thlen phei veleh ka thiannu thil min thawn tum ka phone nghal a. Ka tawng a lo hresual nge, ka tawng sual ve hrim hrim pawh ka hre zo tawh bik lo, Network Travels lamah bungrua a lo dah daih pek a. Hmanhmawh nen chuan a inhmehlo kher mai. Tichuan a rang a rang a rawn thiar phei turin ka ti a. Hetia ka nghah chhung hian thawkna hun pawh ka nei ve ta deuh. Bus hi dar 3-a chhuak tur a ni a, mahse mi zawng zawng ang bawkin Indian Standard Time hmang ve tho an nih vangin a hun takah an chhuak ngai bik lo. Tichuan dar 3 leh minute 20 velah Guwahati khawpui chu thla khat vel chhung bye bye turin kan chhuahsan ta a ni.

A hma zan ka mut tlem avang leh nilenga ka buai avangin ka lo chau ve deuh pawh a ni mahna, ka mutthlu nghal ta bawrh bawrh a. Kan harh leh meuh chuan Shillong kan lo lut der tawh. Hetia ka harh rual hian bus ka chuan apianga ka rim hriat ziah thin, fresh em em mai leh Shilliong khaw boruak thiang karah phei chuan tak tha zet mai, vaipa mawza uih chuan phur tak mai hian min lo hmuak leh reng tawh mai a. A tu ber nge tih hriat tumin kan hawi kual vel a, mahse vai zawng zawng kha chuan pheikhawk an lo phelh deuh vek tawh si nen, puh tur ber hre tawh bik hek lo, ngawi rengin ka tuar leh ta tlawk tlawk mai a ni.

Zin apianga ka buai ve ziahna thin chu ka kawpuar thin hi a ni. Tun tumah pawh hian ngai te bawkin kawchhung lamah boruak a in siam leh nasa hle. Chutia vawih ka ip tang tang lai chuan ka harh chhuak ta zawk mai. "Vai hovin mawza uih an nei a, kei chuan vawih ka nei a, eng vangin nge ka insum reng bik ang," tiin ka inngaihtuah ta a. Tichuan inthlahrunna chhe te mah nei lovin ka hmanraw neih ve chhun chuan phai vai ho chu kan do let ve ta chu ania. Ral donnaah reng reng hian fimkhur hle tur. Tun tumah pawh hian a silencer tha ber chi vuah in kan theh ta thin a, uih ti fe fe chu an awm ve ngei ang. Mahse rinhlelh nih ka hlauh avangin leh ral rama ka la awm bawk si avangin kan muhil der daih a, fing ka in ti ve khawp mai.

Tun tum ka zin hi vanneihthlak takin ka tluang, han sawi vul lutuk tur engmah ka tawk hran lo. Mahse zan a chaw min ei har pui lutuk kha chu tun thleng hian lung hi a la awi thei tak tak lo. Vawksa rep ei tum kha ka nia, mahse kan tlai a zarah an lo inkhar hman a, vai chaw tui lo zet mai, man to bawk si ka ei phah ta ringawt a.

Thil pakhat chiah chipchiar deuhin ka sawi ang. Chu chu kan zinpui mi pakhat chanchin a ni. He pa hi ka thianpa thianpa lehchhawng a nia, a hming ka hre thei thlawt lo. Ka haw ni hian chawhma lamah interview a nei a, bus pawh hi a rawn nang lo teuh hle. Seat lah chu a hnuhnung berah chauh a lo awm tawh bawk si avangin ka thianpa chuan a tuk a haw mai turin thurawn an pe a. Mahse Aizawlah thil pawimawh deuh mai tih tur a neih chuanlamin a rawn tel ve ta thova. A hnuhnung ber a chuan hi ka lo tih ve zauh zauh tawh avangin thil namai lo tak ani tih ka hrechiang khawp mai. Mut a harsat mai bakah mi a sawh nat bik avangin ka sil thum zel.

Ka thiana hian Company peng kan thlenin dar zat min rawn zawt a, ka sanaah chuan dar 2 leh minute 10 chiah a lo ni a. Serious vak chuang lo hian dar 3 rik hma a Zemabawk field thlen hman a ngaih thu min hrilh a. A chhan kan zawh chuan Mizoram Police Service physical examination ni a lo ni a, chu mi nan hman a lo duh chu niin. Nuih hi a za letling zawk hial. Kei ni ila 100 meter race tlan ai chuan 100 minutes sleep ka thlang zawk ngei ang. A tlaidawn takngial avangin Bawngkawn atangin taxi in a phei a, chu chu tun thleng a ka hmuh hnuhnun ber a ni ta rih. In ka thlen hnu darkar 1 velah Guwahati lama ka thianpa ka zuk phone a, kan thianna tlin thu min rawn hrilh ta tlat mai. A lawmpuiawm rual rualin nuih hi a za tlat. Bus in a a thin chauh zawh loh khawp a fit khatiang mihring kha an vang ngawt hian ania ka rin. Tling chho zel se ka ti khawp mai. A hnu a ka hriat leh zel dan chuan, hetia physical a exam tuk hian Aizawlah tho hna dangah interview a hmachhawn leh a, chumi tuk chuan Guwahati lam bawk panin a liam thla leh ni awm tak ani. Mizo thalai tam tak angin awmhmun atangin hna a zawng lo tawp mai.

1 comments:

Anonymous said...

i thianpa thianpa chu a ngaihsanom ve....:)

Post a Comment