I hria em?

Kan thalai chanchinbu "Thalai Aw" editor exam a neih avangin ka chhawk a ngai si a, ka article post tum pawh ka la zo thei lo. Chanchinbu a chhuah tur internet a ka zawnna lamah eng eng emaw ka hai chhuak a, ka rawn post ta mai. Ka hriat hnu a awm nual a, mahse thenkhat ka la hriat ngai miah loh leh ka lo chik ngai lem loh pawh a awm ve nual mai.

• Baptistu Johana leh Isua te kha an lo inchhung hnai khawp mai. Tunlai tawng tak chuan ‘second cousin’ an ni.

• Isua khan pianpui unau mipa pali leh hmeichhe pahnih a nei a. Marka bung 6:3 a a lan dan chuan, a unau mipa te chu Jakoba, Josea, Juda leh Simona te an ni.

• Goliatha kha feet kua (9) zet a sang niin an sawi.

• “Bible” tih hi Grik thumal “Biblia” tih atang a lak a ni a, “lehkhabu” tihna a ni. Biblia lo chhuahna chu “Byblos” a ni leh a. Hei hi lawng chawlhna hmun, hmanlai Grik hovin lehkhapuan an lakna thin a ni. Lebanon vel bawr a awm khu niin mi thiamte chuan an ring.

• Bible hi tawng pathum - Hebrai, Aramaik leh Grik tawng te in, khawmual pathum - Asia, Africa leh Europe-ah te ziah a ni.

• Tun a kan hman lai mek Bible hi a hmasa ber chu Council of Hippo in kum 393 AD-a a pawm a ni.

• John Wycliffe-a leh John Purvey-a te’n kum 1388 khan Bible hi saptawng (English) in an let.

• Bible a thumal sei ber chu “Maher-salal-has-baza” (Isaia 8:1) hi a ni.

• “Do not be afraid” (Duhlian tawng chuan ‘hlau suh’ tihna a ni thei ang chu) tih hi vawi 365 Bible-ah hian a lang a. Kum khat a ni awm zat nen a in ang chiah a, nitin vawi khat theuh in a sem rual theih tihna a nih chu.

• Bible-ah hian “Kristian” (Christian) tih thumal hi hmun thumah chauh hmuh tur a awm. Chungte chu - Tirhkohte Thiltih 11:26 leh 26:28, leh I Petera 4:16 te an ni.

• Khawl (printing press) a lehkhabu chhut hmasak ber chu Bible hi a ni a. Kum 1454 AD a Johannes Gutenberg-a chhut a ni. He Bible hi vawnthat a la ni a, khawvela Bible man to ber a ni nghe nghe.

• Estheri lehkhabuah hian “God” (Pathian) tih thumal hi vawikhatmah ziah lan a ni lo.

• Bible hi khawvela lehkhabu do nasat ber, lehkhabu hralh tla ber leh lehkhabu ruk ngun ber a ni a. Minute khat chhungin bu 50 zel hralh ang a ni. Tawng 2,018 chuang a lehlin a ni tawh.

• Zirtir sawm leh pahnih te kha an thawmhnaw hak lai bak engmah ken belh phalsak an ni ngai lo.

• Pharoa te khan kum 3000 chuang teh meuh Aigupta ramah ro an rel.

• Bible a telh ve tak loh lehkhabu thenkhat a awm. Chungte chu “Apocrypha” tih an ni.

• Lal Solomona khan nupui 700 leh hmei 300 lai a nei.

RTPA weds Dr. Esther. Well, almost...

Mizo tawngin a title tur kan ngaihtuah a, mahse duh anga mawihnai ka ngaihtuah chhuak thei tlat lo. Sap tawngin kan ziah zawm zel dawn a, ka duh ang ka ziak chhuak leh thei bawk si lo. Mizo tawng bawkin i han ti leh mai teh ang.

Ni 22 (Thursday) ah moneitu tur RTPA chu Guwahati airport-ah ka lo va hmuak a. Chawhma dar 11:50 bawr velah ka nau Adiki, Chennai a awm ve tho nen an lo thleng. Airport atangin kan phei nghal char char a, kan hostel bulah thuneitu lamin sam met tur a order min pek avangin a changtupa sam kan han meh tir leh te te a. A met thiam lo nge, a sam a chhe ve hrim hrim pawh ka hre tawh bik lo, hun a duh rei phian lehnghal. Kan duh aiin kan tlai a, chawhnu dar 3 vel bawrah Shillong lam panin kan chhuak hman ta chauh reng a ni.

Shilllong hi zan dar 7 rik dawnah kan lut a. Kan tlai deuh tawh avangin kan chhungte thlenna lam tlawh hmasa lovin, mo tur te in lamah kal tlang nghal. Thil mak deuh mai chu, ka u-a hi kan han thlen tak tak chuan a lai ve deuh rut!! Chaw tuhnai tak min hlui a, mahse puar khawp pawhin a ei ngam meuh lo. Chaw ei khamah man inhlanna neih a ni a, tih tur kan neih ve tawh lem loh avangin kan thlenna tur lam PCI guest house kan pan ta a ni.

A tuk ni 23 (Friday) a mo thlahna programme hi Shillong Mizo Baptist Kohhran Hall-ah neih a ni a. Zing kar atangin khua a dur khuih reng a, dar 11 vel bawr atang phei chuan a insum zo ta ngang lova, che thei lek lovin mi a siam phah a. Hei vang hian programme pawh a hun ruat lawk chhun dar 12 ah kan tan hman ta lo. A khaw chhiat ngaihtuah chuan mipui kal kan thahnem khawp mai.

Inneihna nilovin mo thlahna chauh a ni, tih kha han sawi nawn leh ta ila. Inneihna tak tak chu Bungkawn Presbyterian Kohhran Biak Inah, tun thla 29 hian neih a ni dawn a ni.

Neuh neuh:
1. A serh zing a a mei ang - CMC Vellore ho thil tih khawmna a khaipa ber leh, huau huau reng renga a serh zinga a mei ang maia an sawi thin chu Dr. Ramdinpuia hi a ni. Pa fiamthu duh em em mai leh mi fiamthu thawh a thahnemngai taka nui thin a ni a. A ka a fiamthu a thawh loh pawhin, a chezia leh a hmelah hian nuih tur a awm ve hrim hrim. Programme kaihruaitu in fiamthu a thawh chang te khan malpui beng meuhin, theihpatawp chhuahin a lo nui ta thin a. Ka bul a thu pitar chuan lo la hre ngai hek lo. Kutzungchal a kawk meuhin, "He pa han lawm fal theih bik em em zia hi", tiin min rawn kheuh a, "mak" a tih hmel khawp mai.

2. Hmangaihna cement - Hei hi kan thuchah ngaihthlak a ni. A common lovin a tha khawp mai. Bang hi cement hian plaster lo ta ila, a lang nalh lo viau ang. Chutiang chiah chuan mihringte pawh hi tumah famkim kan awm lo. Nupa kan lo nih tawh phei chuan 'hmangaihna cement' a kan in plaster nalh tawn thin a tul hle a, dam chhung in 'hmangaihna cement' chawk thin turin innei tur te a chah a ni. RTPA phei chuan 'quick dry cement' kher nise a ti.

3. Kan camera - Zanah kan charge ve ngat ngat a, a tuk zingah kan ken theihnghilh hlauh. Adiki'n a hnuah, "Kan kal dawn khan lukham hnuaiah ka hmu reng a", a ti duh chauh. RTPA thianpa Pip-a tih dan takah, kam tam nih a hlau pawh a ni mahna.

4. Keimah - Khatiang em em a formal khan programme an siam dawn tih ka hre lawk lo. Ka hak lai bakah T-shirt pakhat a spare ka keng, chu zawng chu ka incheina neih chu a ni. Tichuan kawr leh kekawr hak tur chu ka ham khawm thei mai a, mahse ka pheikhawk bun tawk tuma'n an nei lo. Tihngaihna dang awm hek lo, zingah PB-ah a thar ka zuk lei ta ringawt a. Tlem a tlemah ka mualpho lo chauh a, chutih rual chuan ka vannei hle bawk.

A bek kha i la pan lutuk ang e aw...

Comedian search a ni lo ania..RTPA with Dr. RD-a

Future groom and bride

Esther-i u Sarah

Kan mo tur hian ar ke a chip hneh khawp mai...

Future in-laws nen

Esther-i te unau

Esther-i te chhungkua

RTPA-a 'ka pu mama'

Tihian kan nalh em?

Banner hi Sarah-i design anih hi

Lunch..ka va ei hnem teh reng em!!

Sarah-i fapa Jaden-a

Guwahati - random pictures

Some random pictures I captured with my phone camera during the past couple of days. I'm not into photography or anything like that, nor am I trying to show off my skills. I just took these pictures by chance, and guess what, they came out better than I expected.

Narakasur hilltop - our college hilltop.

All pumped up for exams! A poster pasted by one of my batchmate on his door.

Construction of a new auditorium in full swing. A view from my balcony.

Spooky..huh?!! TV tower on Narakasur hill top taken on a cloudy day.

The setting sun in it's full glory.

"Woner"

Khaw lum hi

Kan Pa, vana mi hnenah hian malsawmna leh mawmawh tinreng dilin ka tawngtai kur ve duah thin. A pangchang pawl tak pawh ka ni hial ang. Dil loh a lawi hi ka nei tawh mang lova, inthlahrun nachang lah ka hre hek lo. Khaw tha tur pawh hian ka dil ve fo, mahse hetiang em em a khawlum tur hi chuan vawikhat mah ka la dil chin ngai lo thung. Anchhia anih loh vek pawhin malsawmna han tih chu a harsa lam deuh a ni.

Khawlum leh thau
Thau hi mei alh a i rawh chuan a sawr fai vek ang. Rawh chiah lova i ur erawh chuan a mawm a rawn chhuak sur sur ang a, a tlawrh hlup ang. Hei hi sarep principle chu a ni. He principle ngei mai hi khaw lum chhung zawng hian duh leh duh loh pawh thlan theih lek lovin keimahah hian apply in a awm ta thin a, intih-sek-siak a tel tur a mawi khawpin ka tliang hlurh zel. Chu chuan hmai a ti bawl duh zek lehnghal a, inlak mitak hnu a hmai han bawl leh kher kher hi chu a ngeiawm hranpa ve hrim hrim.

Ka pian tirhin naute chum beng buang ka nih thu tuma’n an sawi ka hre lo. Chaw lah vantlang chunglam ei bak a hrisel leh tha ei thei tur khawp a hausa kan ni bawk hek lo. Mahse hei hi chu ka chiang. Ka ei apiang hi ka ngeih em em thei zel. Malsawmna chu a ni chiang. Mahse mihring famkim lohna a lo lang a, a vawksa heh hehah ka la tang zui. Insum theih loh luatah hriselna in a tuar lo chauh thin. Baptistu Johana’n khaukhuap leh kawizu ringawt chaw a a rin ang deuh khan samtawk chum, fanghma leh tuisik ringawt pawh hi ring ila, ka thaupui thei tho vang.

Khawlum = rimchhiatna
Khawlum zual lai chuan thlan hi zun aiin a let engemaw zatin in a tam. Hei hi hriselna atan a tha a, mi pangngai chu an vun a lo engin an ngo phah suah thin. Keiah erawh hi chuan a hna thawh dan a letling leh hlauh thung. Thlan ka ngah poh leh ka vun in thim lam a pan a, hriselna lam aiin rimchhiatna ka lansarh pui zawk tlat thin. Hei hi mi ka an lohna nge, midang aia ka chungnun zawkna pawh ka hre tawh bik lo. Vai ho vun hil bul han hmuh hi chuan an hnar a han sawk sak nghek mai te hi ka duh thin.

Khawlum sexy lo
Khawthlang lamah chuan an khawlum (summer) lai hian beach-ah te leh hmun hrang hrangah an awm ‘sexy’ sup sup thin. Khawlum leh sexy hi mi tam tak chuan kan thlunzawm sa ve hrim hrim. Sexy-na hmanrua hi pawimawh tak tak a awm. A hmarua a zir hian mi an sexy in an sexy lo thei. Hetah pawh hian kei mi piang dangdai ta ngang chu a danglam leh tlat. A chhan kan sawifiah ange.

Khawlum laia ka taimak ve na tak chu inbual hi a ni. A dik tak chuan ka rimchhiat miau si chuan taimak ngawt loh chu tih theih dang ka nei lo. Inbual ngun chuan kekawrte kan su ngun lo thei thin silova, a hek duh pap pap khawp mai. Suk ngun na na na chuan a rawng a da chakin a mawng a pawp thuai thuai a, a pawhfan (elastic) lah a rul duh em em mai lehnghal. Hei vang tak hian han in phelh sexy ngawt chi pawh ka ni lo. A ‘vaw hawt’ tu tur ber a lo chul deuh rup si chuan sexy a hnekin tawphnawk lam ka pawl mah mah zawk dawn tlat. Thil hmunawm tak leh hmuh nuam tak anih ka ring miah lo. Han ngaihtuah ve chin mah teh, ka kekawrte a ‘TARA’ tih inziak aiah khan ‘TARARA’ tih a lo nih loh vek pawhin, ‘A’ hi a lo karful tawh maithei tlat. Chuvangin khawlum lai hi chuan sexy ve loh hi ka mawipui zawk a ni e.

Thlarau nun a khawih
Phai khawlum hrehawmzia lanchhuah lehna pakhat chu inkhawm lai hian a ni ngei ang. Awm mai mai pawh a a uap tih tawh nak alaiin, inhmuam uap chawp an la ngai leh bawk si a. Muthlukna thlarau a rawn thawh tawh chinah phei hi chuan thlarau nun hi a tlahniam lo thei thin lo. Sermon sawi tawi apiang hi thu sawi thiam an ni ringawt mai a, ka mutthluk hma a thlarau nun chawm thei thil sawi zo hmasa apiang kha ka hlawkpui. Siamtu pawh hian mi a hriatthiam ve deuh te kan ring thla ve leh ngawt thin a, a lo nih loh hlauh phei chuan ka chan a chhe ngawt ang le.

Kum 2001 atang khan hostel-ah ka la awm char char. Chuta ka thil chin chhuah pakhat chu, light awm loh rual rual a theihpatawp a khek vak hi a ni. Khawlum a tih nawm phah pawh ka hre chuang lo, anihna takah chuan zual zawk awm tak a nia. Mahse han khek chiam mai khan chhung lamah hian nuam tih veng vengna leh thawven hawkna min pe thin. Inkhawm laia light a awm loh thuh hian kha kha a tih theih ta thin silova, mi hi a rawn hnawh up up a, ka puak keh lo chauh thin.

Thatchhiatna bulpui
Mahni tawk a zawi tawh nak alaiin, khawlum in mi an sawisak leh ngat phei hi chuan hmuhtlak hi ka awm thlawt lo. Chuatah a tleng hian ka tleng lo chauh. ‘Thawk lo chuan ei pawh ei suh se’ tih kha zawm tak tak tur phei chu nisela, tam hlum hmasa ber ka nih loh vek pawhin a dawttu tal chu ka ni hrim hrim. Eng anga nasa pawhin ni khi han in sang phek mahsela, mutchhuak lem lo pawh hi ka hnungzangin zawl a deh tawh chuan ka chatthla thei mai zel. Hei hi ka talent dawn tam tak zing a mi, eizawn nan a hman tlak chuang miah lo a ni. Han peipun leh ngaihna pawh a awm tawh chuang lo.

A lo nimaw...!!

Zunkhum nge chil chhak khum i duh zawk?

A tenawm dun thawkhat bawk a, duh thlan tur zawk pawh hriat a har viau ang. A tam zawk ngaih danah chuan chil ai chuan zun a tenawm zawk maithei. Patling thankin zun ngat phei hi chu a hing tha tiah tiah bawk si nen. Mahse beng sikin i han ngaihtuah chiang teh ang.

Mi hrisel pangngai, zun kawng a natna nei lem lo zun hi a sterile (natna hrik a awm lo) tlangpui. Kan ka chhungah ve thung hi chuan, eng anga hrisel tha pawh ni ila, natna hrik tam tham fe an awm ve deuh reng a. Chil vawikhat kan han chhak chhuahah ringawt pawh hian natna hrik za chuang fe kan chhak chhuak tel thin a ni. Chuvangin, nunna thapa duh zawk thlan a ngai palh hlauh anih chuan, rimchhe deuh mahse, inzumkhumtir a him zawk maithei.

Vawih hi engvangin nge a uih? A alh thei reng em ni?

Vawihah hian boruak (gas) chi hrang hrang a awm a. Vawikhat kan han vawih chhuahah hian boruak awm tlangpuite chu – Nitrogen (59%), Hydrogen (21%), Methane (7%), Carbon dioxide (9%) leh Oxygen (4%) te an ni. Vawih thlawh chak zawng hi second khatah metre 3 (3 m/s) vel bawr a ni a. Mi pangngai hi nikhatah litre chanve vel kan vawih tlangpui bawk. Mipa leh hmeichhiain danglamna kan nei lo. Chief Minister leh Governor pawh an vawih ve thin thova, super model thlan thar ho pawh kha an bang bik chuang lo tihna anih chu.

Vawih hi a uih nachhan chu boruak (gas) chikhat, hydrogen sulphide vang a ni a; mahse he boruak hi za a pakhat pawh a tling lo. Hydrogen leh sulphur inthlunzawm (combine) a ni a, sulphur zawk tak hi a uih em em nachhan chu a ni. Vawih uih leh uih loh chu kan thil ei leh in in a hril thui hle. Bean, cheese, zikhlum leh artui ei hian a uih duh bik.

Chubakah chuan, boruak alh thei – hydrogen leh methane an awm tel bawk avangin a tam thamah chuan alh thei tur a ngaih a ni.

Chaw nge mut kan mamawh nasat zawk?

Gauhati Medical College zirlai mipa ho hi chuan kan mamawh nasa khawp mai a, a pawimawh zawk sawi tur kan hre hauh lo! Allout (thosi hlo), company lam in zan 45 daih tur a an siam thla khat pawh hmang daih lo te kan awm laiin, mai kan leh dal ringawt nen pawh a laipawng thle lawl khawp a hostel chaw ei thei te kan kat nuk mai.

Mithiamte’n an chhut dan chuan, chaw aiin mut kan mamawh zawk fe a ni awm e. Chaw ei lova kar hnih chuang kan dam theih laiin, ni sawm vel bawr kan mut loh chuan kan taksain zo lovin kan thih phah tawp thei an tih pek chu. Kha daih kha asin.

Carrot ei tam hian mit a tivar thei tak tak em?

Vitamin A tlakchham chuan khaw hmuh a tifiah lovin, mit delna a thlen thei. Carrot-ah hian beta-carotene a awm a, chu chu kan taksain vitamin A-ah a lo let (convert) thin a ni. Amaherawhchu, kan nitin mamawh zat hi a tam lutuk lova. Mamawh bak chuangliam a awm anih chuan hman tangkai lohin kan taksain a paih chhuak ve leh mai thin. Litre khat bur a tui litre khat bak a leng lo nen hian a tehkhhin theih awm e. Mahse carrot ei a ngailo, kan tihna a ni chuang miah lo a nia.

I taksaah khan rangkachak leh silver a awm...i awih lo maw?

Mak i ti ngei ang. A mak reng bawk a, kan thiam lo hauh lo che. Keini pawhin kan han chhut a, rangkachak leh silver ei thei khawp a hausa kan ni bik si lova, a ngaihna kan la hre thei bik tlat lo. Mahse keini aia mithiam zawkte’n a awm an ti miau si a, i han awih ve leh phawt mai teh ang u.

An sawi zel danah chuan puitling kg. 70 vel bawr taksaah hian a tam ber chu oxygen a ni a, kg. 43 vel bawr a awm. Silver hi 2 mg. vel bawr a awm laiin, rangkachak hi 0.2 mg vel bawr a awm ve thung. International market a i man zat tur chu lo chhut ve tawh mai rawh le.

Khawvela natna tlanglawn ber enge?

Natna tlanglawn tak tak chu sawi tur kan hre nual ang. Mahse a ber chu sawi fak a har kan ti maithei. Hritlang hian a khat tawkin mi a tibuai ve chawk a, chutih rualin lu na pawh hi buaipui tham fe chu a ni ve hrim hrim. Khawvel pum pui a natna tlanglawn ber chu maw, i rin loh lampang a ni daih dawn a nia. Khai mah aw, i inring em? Khawvel a natna tlanglawn ber chu ‘ha nget’ (tooth decay) hi a ni. Daih mai a.

Tun tum atan chuan duhtawk phawt ang. Kan zirlai a a tul lo lo hi kan lo lawrkhawm leh anga, Pathianin rem a ti te anih chuan nakum lamah kan rawn theh leh hak dawn nia.

(He article hi AMMSU annual magazine 'Chhemdamthli' 22nd edition-ah tih chhuah a ni. A master copy ka hmu chhuak leh a ka rawn post leh ta mai mai a ni e. Ka thawh a ni bawk a copyright ka la nei tho ang chu maw:-))

Khawchhak excursion

Kum 2006 December thla khan mi vanduaina a zarah vanneihthlak takin (ka tawng lo haw lo sela) khawchhak lam, Burma ramri depah zinna hun tha tak mai ka nei hlauh mai a. Ka pian hnu lam a ka thil la hmuh ngai loh leh ka hmuh leh kher tawh loh tur tam tak ka han hmuh phah a, a nuamin a ropui danglam hle. Motor khalhtu tur an awm loh avangin ka roommate nen Guwahati atangin chawl maih lovin Vaphai kan thleng thak a, taksa chuan a tuar ve deuh. Ni ruk zet kan thang chhung khan zan hnih chiah khumah kan mu thei a. Amaherawhchu, thian rual zin kan ni bawk a, hah leh chauh pawh kan hre hman meuh lo. Kan zin kawng leh hun hman dan te chu dah tha ta rih ila, ka thil hmuh leh hriat tlem ka han ziak lang ve dawn a ni. Mahse historian ka nih loh avangin keima khaw thlirna tlang atangin ka hriat hriat ka ziak ve mawlh mawlh mai dawn a ni.

Tan tlang - Hei hi kan pi leh pu ten ramhuai ho khawpui, an hotupa ber Lalchungnunga hova an chenna niin an ngai a. Tlang lian ve tak, ral khat atang pawh a langsar tak mai a ni. A san zawng hi feet 6356 a ni. Chal lam leh chhip lam a nei a, a tlangpuiin a chal lam atangin an lawn a, a chhip lam atangin an lo chhuk leh thin. Engemaw chen chu motor pawhin a lawn theih nghe nghe. Zing chaw ei khamah kan chhuak tan a, a chal lampang a lawn tanin muangchangin kan kal beuh beuh a, a remchanglai apiangah thla kan la zel bawk. Boruak a thengthaw nuamin khaw hawi a nuam hle.

A lawn hrim hrim pawh hmun hnih khat tih loh chu khirh em em a awm hran lo. Ka chiang chiah ta lo, dar 11 vel bawr niin ka hria a chhip kan thlen kha. A chhip han tihah a zawl deuh durh a, thingkung pawh a la tamin daihlim han hahchawlh maina tur pawh nuam tak tak a awm. Kan kal lai hian Kohhran pawl pakhatin (an hming chu sawi lo mai ila) chunglampang hriattirna kan dawng e, tiin thing engemaw zat an kih bakah lei an lo lai phut durh mai a. Engmah chu ka sawi lem chuang lo na a, ka rilru te te chuan Forest department lamin an hre ve awm tho si a, a venhim lam a hmalakna a awm lo chu mak ka ti angreng hle. Tan tlang hi lawn chhuah nan darkar 6 vel kan hmang ta in ka hria. Hmanhmawh deuh chuan a aia rang pawhin a lawn chhuah theih ngei ang.

Fiara tui - Fiara chanchin hi chu sawi ngai lovah han ngai ta phawt ila. Fiara tui chungchangah hian Vaphai leh Farkawn khua te inkarah inhnialna a awm avangin ziah fimkhur a ngai viau ang. Tuna ka ziah tur hi chu Tan tlang a awm, Vaphai khaw bul a awm zawk kha a ni tih han sawi hmasa ta ila a tha awm e. Han sawifiah ngaihna vak pawh ka hre lo. A hnar hi hmuh theih a ni lova, lungpui lian tak hnuai atangin a rawn luang chhuak a. A kua hi a len zawng chu rasagula bur ruak a tui thal nuam tawk vel a ni. Vawi khat kal manah tiin kan inbual nghe nghe. A vawh chu a vawt ngat ngat khawp mai a, mahse inbual man a awm khawp in ka hria. Aizawl lam a hawn turin bottle ruak kan hmuh ang ang kan thun khat a, mahse ka chhungten min lo ngaihhlut sak lem lo kha chu ka rilru a na ve deuh.

Thasiama seno neihna - Thasiama chanchin hi sawi duh viau pawh ni ila, sawi tur em em ka hre lo. Tlang bawk te reuh te, a chhip zawl, a pang awih tak a ni. Kawng sial lo phei sela chuan ka lawn theilo chiang ngawt ang. A chhip zawl hi a dung feet 20 vel emaw a nih ka ring a. A vang erawh chu zim te a ni a, a lai takah a rek bawk. Vaphai khaw pitar pakhatin an tet lai a a chhip zawl a an inkawibah thin thu min hrilh a. A thu sawi atanga chhut chuan muang changin a chim (erode) ni ngeiin a rin theih. Mahse tunah chuan a chhip hi cement a plaster a ni tawh a, railing pawh siam anih tawh avangin he hmun, hnam anga kan hmun pawimawh tak hian min ralsan lo turah i ngai phawt mai teh ang. Hman deuh khan pawl kalsual pakhatin a hnuaiah hian rohlu tam tham tak a awm e, tiin laih chhiat an tum a. Mahse an khap dai thei hram a ni awm e. Hetiang ang rinna at thlak tak tak, kan history a hmun pawimawh suasam duh tu te lak ata hi kan ven that tlat a pawimawh khawp mai. Thasiama seno neihna atang hian Tan tlang hi a hmuhnawm hle a ni tih kan zep tel lawk ange. Tin, kan thianpa pakhat chu Thasiam seno neihna nilovin 'Thansiama sakawr no neihna' ah a lo kal bik a ni awm e.

Lurh tlang - Burma ram chhung a awm a ni ta in ka hria, a hmun a kal thlen ngei pawh a chakawm khawm mai. Lurh tlang hi pipute chuan Chawngtinleri puan banna niin an ngai. A bak chu sawi tur ka nil.

Maurawkela tui - Maurawkela hi tunge a nih chu ka hria a, mahse ka sawi thui thei lem lo. Maurawkela tui hi kawngpui sir mai a awm anih avangin hmuh tlak a awm tawh meuh lo. Tuikhur rauhsan tawh hi a ang ber in ka hria. Kawng an laih dawn hian lo thlir thui deuh nisela chuan hetiang kan Mizo history a hmun hmingthang tak hi a vawnhim dan kawng chu a awm ngei ang le.

Lianchhiari lunglen tlang - Dungtlang khua a awm Lianchhiari lunglen tlang hi Zofate zingah chuan hre lo kan awm tlem viau ang. Chuvang chuan a thawnthu lam kha chu lut lo law law mai ila. Vaphai atanga kan chhuah tlai deuh avangin Dungtlang kan thlen meuh chuan khua a lo thim ti tih tawh a, thlalak pawh duh angin a fiah tawh lo. Thlalak fiah lo ai mah chuan he hmun atang a khua duh angin a thlir theih tawh loh kha ui tak te in ka ui. Hman deuh khan a lung hmawr hi a khi a, chetsual a hlauhawm avangin an chhu thla a, a lang bul deuh hmuih tawh. Thlifim han dawn deuh heuh heuh chu a thawven thlakin rilru sual put duhna thinlung a chhem kiang deuh sawng sawngin ka han hriat tlat pek chu.

A tlangpuithu chuan kan khawchhak zin hi nuam ka ti lutuk ringawt. Kan pipute sulhnu leh Mizo thawnthu a hmun tam tak, a thu ringawt a ka lo hriat thin chu a tak ngeiin ka han hmu a. Hunin min daih loh bakah kan zin chhan ki nen han len vah vak kha a inhmeh chiah loh avangin a lehpek awm theih dan tur ringawt rilruah a awm a. Duhthusamah phei chuan Farkawn thleng rak a kal a, ram riak ngei a thawhchhuah a chakawm khawp mai.

Tan tlang chhip a signboard intar

Thasiama se no neihna, a hnunglam khi tan tlang pang

Tan tlang chhipah

Vaphai khua a ka 'fans' te