Aizawl khawpuiah - Infiamna thar

Mizote hian infiamna (sports) kan uar viau. Amaherawhchu, infrastructure tha kan neih miau loh avangin hma kan sawn muang thung. Mi fate chuan carpet ang mai a mam a hockey an khelh laiin, keini ve chuan kan la vaw khu tulh tulh a. Kan footballer te pawh an skill tuaihriam lam aiin chirh diak pal chak lamah hma an sawn chak zawk. Chuvangin hmasawn theih lohna lam tih ve phet ai chuan, kan Aizawl khawpui pumpui hi infiamna, hma kan sawn theihna tur ang chi atan hman tangkai dan tur in ngaihtuah chhin teh ang.

Bike racing

Kawng zim leh kawi em em bawk si kan nei sa. Chuan tlangval chawmhlawm leh tih tur nei lem lo, bike changkang leh nalh tak tak a ‘modi’ tam tak an awm leh. Bike racing tan nan a bak mamawh kan nei tawh lo. Kan tlangval te hi intlansiak chak in an ter et et reng bawk si a, han fuihpawh hranpa pawh an ngai tawh lovang. Chumai bakah dan ang thlapa thil kan tih dawn avangin, police hlauhna nei miah lovin an intlansiak thei tawh dawn a ni. A tihmuhnawm zual turin traffic jam zual lai ngeiin kan han ti zui bawk anga, a va ropui dawn tak em!

Bike racing ('street racing' te pawh a tih theih tho mai) hi category hnihah kan then ang.

1. Individual – A khalhtu chauh a ni ang a, a hnungah passenger phurh phal a ni lovang.
2. Double – Hei hi nula phur chungin a ni ang. Amaherawhchu, an nula phurh te mawng er leh er lohvin kawngro a sut takin, an mawng er theih chin tawk kan bituk sak ang.

Tichuan an intlansiak dan tur chu hetiang hian in duang chhin teh ang. Zemabawk helipad hnuai atangin an tlan tan a ang a, an tan hma hian tui bottle khat theuh an in zo tur a ni. Check point number 1 chu Zarkawt ni ta sela. Hetah hian kuhva hring, chinai tel lo an ei ang. Chuan an tlan leh char char ang a, check point number 2 chu Kulikawn a ni leh ang. Kulikawn-ah hian chinai tlem pir kan phalsak ang. Tichuan an rawn tlan kir leh char char ang a, an tlan tan hma a an tui in khan an zun a lo tichhuak vel chiah tawh bawk ang a, check point number 3, Chaltlang chawhmeh bazar bulah an zung ngei ngei tur a ni. Zun chhuak lo chu kan disqualify nghal hmak ang. Finishing line chu Zemabawk helipad hnuai bawk kha a ni dawn a ni.

Hlawh a hranpa a pek pawh an ngai kher lovang. Police ven thawn tur awm bawk silova an bike chak tak tak a han khalh velna hun kan siamsak kha an lawm tawk viau turah ka ngai. Tin, kan tlangval te hi thawchhuah nei lem lo, ‘khawi maw’ pai reng an nih avangin, kuhva hring kan khilai nghal bawk dawn tihna a ni

Second hand shaking competition

Second hand tam tak mamawh anih avangin, second hand khawpui Aizawl bak a hmun remchang a vang viau ang. Mipa lam tel theih pawh ti mah ila, kan Mizo hmeichhia te hi han el phak rual an ni lo tih hre chiang em em tu, mipa lam hi an lo tel ngam ka ring chiah lo. Chuvangin, hmeichhe tan chauh tih nghal law law kha a tha mai in ka hria.

Second hand hmanga kan infiam dan tur chu hetiang hian nise. Second hand kha a buk inzat chiahin hmun sawmhnih velah kan chhep ang a, tah chuan a inzat theuhin, a hma a teddy bear lem awm emaw, kawrkilh pali nei emaw, kekawrte rose par chuang emaw te kha kan chhep ral leh ang. Uluk takin kan chawhpawlh leh vek ang. Chu chu kan contestants te khan an in thin chhuah siak tawh mai dawn a ni.

He infiamna hi a senso a awm anih pawhin, Aizawl nu ho second hand atchilh zia ka ngaihuah hian sponsor hmuh ka huphurh hauh lo. A lawmman tur pawh hi second hand bawk kha kan sem leh nghal mai dawn a ni.

Spot a celebrity

A game a simple viau, mahse a hahthlak deuh maithei. Contestants te digital camera satliah ve tak kan pe theuh ang a, tichuan a hun leh hmun tiam chhung a celebrity te thla lak pui hnem ber kha pakhatna a ni mai dawn a ni. Amaherawhchu, mahni chhung hnai leh thian tha celebrity te chu pawm a ni lovang.

Tin, mipui hriat loh a kan tih a ngai ang. Anih loh chuan kan celebrity te an rawn inlar nasa lutuk anga, a game a awl lutuk phah thei tlat. A lawmman tur hi tha ve deuh hlek pawh a tih theih ka ring. A vang chu kan celebrity te vek hian sponsor an chak zek zek awm sia.

Duhtawk phawt teh ang. Nang leh kei hi kan ho lutuk dawn tlat. Hun remchangah kan la chhunzawm leh dawn nia.