Fakna

Nimin lamah bomb a puah avangin hmun thenkhatah curfew puan a ni a, naktuk hian VHP hovin bandh huaihawt an tum bawk :( . Mahni room a tawm tlawk tlawk a ngai dawn anih hmel, kan tawm hmin em lovang chu maw :D .

Khawnge, tihtur a awm lo em mai, a tangkai lo leh hmasawn lo zawng bawkin thluak in vawrh vir leh dawn chhin teh ang. Tunlai khawvela electronic leh printed media a advertisment (fakna) pawimawh zia kan hre theuh awm e. Tlem a zawng kan ngaihtuah chhuak ve a, fiamthu vek ania, huat awih miah loh :) .

Hnahlan Grape Wine
Total Prohibition dan bawhchhe miah lova ruih i duh chuan, Hnahlan Grape Wine hi i tan liau liau a siam a ni e. Pumna damdawi erawh i ngaihtuah chawp a ngai ang.

SRS
Excise & Narcotics Department hnathawh peih loh thawk tur leh, an sulhnu chhui turin engtiklai pawh a koh theih kan ni. Tin, a thlawnin mi kan vaw hrep thei bawk e.

Party Worker
Nilenga party office a thu hman tur, hnathawk lova eizawng duh party worker tur mamawh a ni a, a rang lamin 'Zoram National Conference' party office-ah dilna thehluh theih a ni. Kohhran lekha thil telin awmzia a nei leu.

Kohhran Upa
Politician/officer sawrkar sum eiruk ching mi i nih chuan Kohhran Upa nih mai loh chu i tan lan mawi ngaihna a awm tawh lo. I sum eiruk hmangin Kohhranah pawnlang takin i la lang mawi thei e. Thlarau chhandamna erawh kan tiam theilo thung.

Anthurium
Mizoram anthurium par tluka mawi leh tha hi a awm lo, officer hausa nupui hovin hneh taka PHE tui supply hmanga an enkawl miau thin avangin.

Sawhthing
Sawhthing quality tha, tui bawk si, a hralhna kan hmu mai thin lo hi i tan vanneihna a ni e. A tawih hma ngeiin rawn lei ve teh khai. A man a tlawm rapthlak!

MHIP
In lama fate kilkawi tha peihlo te tana tlanchhiatna chance remchang. Amaherawhchu, i fate felna leh sualnaah mawh kan phur lovang.

MZP
Zirna/thiamna leh hnathawh a chhuan tur neilo te tana politics khelhna platform awmchhun. Mahse tunlai thangthar ho ngaihsan nih inbeisei suh.

:D :D :D

Z.P.P khawmpui

Zoram Pawn Presbytery (ZPP) khawmpui vawi 12-na chu October ni 9-12, 2008 khan Guwahati Mizo Presbyterian Kohhran Biak Inah neih a ni a. Thupui 'In kawngte chu chhut ngun rawh u' (Hagaia 1:5) tih chu Upa K Vanlalawna (Bishnupur) leh Upa Lalhuma (Kohima) te hnen atangin ngaihthlak a ni. Tin, pathianni zanah Rev Dr Vanlalnghaka hnen atangin thuchah ngaihthlak a ni bawk. Rorel palai hi an vaiin mi 80 vel bawr an ni. ZPP-ah hian Pastor Bial pathum - Shillong, Guwahati leh Kohima te kan awm mek.

Mahni tawka ka buai ve em avangin kimchang taka report tur pawh ka hre lem lo. Chuvangin thlalak hi i han dah tlar leh thut phawt mai teh ang. Hei pawh hi ka khawn khawm chawp ania, tu te emaw duhthu chu a sam kher lovang ;) .

Inkhawm ban apianga thingpui thlum leh hang in tur lo buatsaihtute hi an fakawm khawp mai. Tar khawmpui ti takah phunchiar fe fe an kat nuk a, naupang khawmpui nena khaikhin chi chu nilo mahse a chhangchhiat thlak ve viau tho. A 'sen hang' leh a 'paw thlum' an siam thin a, pitar pakhat chuan, "A 'sen thlum' leh a 'paw hang' siam tur che u alawm", zu han ti hram a mawle :D .



Motor khalh tu tur indaih hek lo, nalh tak tak a rawn inchei chhuakte pawh kan han inpawt chawp nawk nawk a. Chuta karah a ke a la tlan puak zui! Balh hlau tak leh fimkhur takin motor ke chu thlak a ngai ta si a nih hi :( .


Kan Biak In hi a len lem loh avangin, inchung hall-ah 'big screen' buatsaih a ni a, Inkhawm lai hi live a tihchhuah thin a ni. Projector thawtu Pu Hriata Chhangte leh a camera rawn thawhchhuah pui a, a tul ang ang buaipuitu Pu Thanga Jongte te an fakawm hle.


Ruai theh hun an nih meuh chuan pastorte pawh an in hmuam up reng thei tawh bik lo. Pu Rinmawia pawh a 'intake' a that hmel khawp mai :) .


Ka duty-na reception counter pawh kan buai ve nak nak thei hle. Fatu leh usher hovin tlanchhiat nan an rawn hman thin avangin anni ho hian mikhual aiin min chim buai zawk thin :D .


Receptionist te hi kan thawh nasat thin em avangin, hun awl kan neih hlauh chuan remchang la in hahchawlhna hun atan kan hmang thin :D .


Guwahati Branch Kristian Thalai Pawl member thlalak nuam ti zual bik te :P .


Fatute baka rim hi an awm kher lovang. Mipui ei tur a zawnin ni 4 ngawt an han siam ania(h)! Ni khat lek fatu pawh a hahthlak tehreng nen. Tin, mipuiin 'an rawngbawlna' kan ei tlang ber :D .


Kan Biak In. Pandal te pawh kan zar ve ngei ania aw :) .


Guwahati zaipawl. Zaina hun vawi hnih kan nei thei a, Halleluia Chorus kan lak nawn nen phei kha chuan vawi thum tihna :P .

Tunlai chu

Zoram Pawn Presbytery (ZPP) lam hawi post kan tum zet a, mahse thlalak tih tlak ka lo neih loh avangin a lehpek atan khek hrih mai teh ang. Camera changkang tak tak kara Nokia 6681, 1.3 MP camera, kum hnih chuang a upa tawh, a keypad pawh ka hmeh bel tlun tawh leh a original rawng khawk nual tawh a, a original lo rawng kai neu nuau a lo click ve chhen kha ka ngam thlawt lo a ni. Post tlak thlalak ka khawn khawm hun atan dahtha tawh mai ang. Nula thlalak te kha a tel ve ngei loh chuan Sekibuhchhuak, Sandman leh hotupa Zorunpuia te ho ngaihdan a ni lo palh thei tlat :)

Tun tum chu lehkhabu chhiar lamah kan pakai ve daih teh ang. Lehkhabu chhiar hi ka peih ve viau. Blog lama chhiar tur suggestion hrang hrang ka hmuh thin te hi ka hlawkpui thin khawp mai. Lehkhabu hi a kawm nalh em vang emaw, chanchinbu lama an fak ngaihnawm em vang emaw a han phek chhiar tawp ai chuan, a lo chhiar tawhte suggestion lak hi a fuh zawk chawk. Chuvangin kum tir atanga ka chhiar tawhte zinga chhiar tlak ni a ka hriat ho ka rawn thehchhuak ve a, a hlawkpui tawk te pawh in lo awm ve mahna :)

Zofate zinkawngah (Zalenna mei a mit tur a ni lo) - R Zamawia
Mizoram Academy of Letters (MAL) in kum 2007-a Book of the Year a an thlan hi nikum November thla atang khan ka chhiar tan a, mahse a inkarah exam a tlakzeh avang leh, phek 1000 chuang zet a chhah anih avangin March thla khan ka chhiar zo thei hram chauh. 'Mizo ka ni' inti chin tan chuan chhiar ngei chi niin ka hria. MNF din tirha Defence Secretary nihna chelhtu Pu R Zamawia hian lehkhabu dang rawn chungin a tir lamah kan history atangin a rawn chhui tan a, MNF movement lo chhuah dan te leh MNF chhungkua a buaina hrang hrang te pawh zep nei lem lovin a rawn ziak teuh mai.

Chutihrualin, awn lam bik a neih (biased) chang a awm zauh zauh. Chhiartuten ngaihdan kan siam thiam mai a tha awm e. He lehkhabuah hi chuan 'Mizo hnam pa' ti a kan chhal Pu Laldenga a HERO lo chiang khawp mai :)

Pasalthate ni hnuhnung - C Lalnunchanga
He lehkhabu ka chhiar zawha ka ngaihtuah zui chu - script writer tha takin sap tawngin han let se, budget tam tawk takin Hollywood director lar takin film-ah siam ta se, Apocalypto hmuhnawm tluk zet khan a hmuhnawm ve ngei ang. Ram inchuh vanga khaw pahnih pasalthate hriamhrei nena mal leh mala an han inhmachhawn vel te kha ka suangtuahna mitthlaah hian a la cham reng mai. Tin, an lal Puilura rilru paukhauh zia leh ropui ziate kha! Pui tak a ni ringawt!! Chhiar ve ngei teh u. 2006 MAL Book of the Year kha a ni e.

Ruam rai thuruk - C Lalnunchanga
Tlaivar thaka ka chhiar peih hi chu lehkhabu nep tak an ni ngai lo. Love story, tragedy lam hawi deuh bawk si, chumi kara ramhuai biak lo inzep tel ve bawk si a ni a, a ngaihnawm ngat ngat khawp mai. Sawi duah lo mai teh ang, chhiar ve ula in hre mai ang :)

The three mistakes of my life - Chetan Bhagat
Sap tawng ka do tihna nilovin, nikum lam atang khan Mizo tawng ziak lehkhabu chhiar tam ka tum avangin sap tawng ziak lehkhabu chhiar ka insum deuh a, mahse Chetan Bhagat a ziak hi chu ka hnar phal ngang lo a ni e. One Night at the Call Center phei kha chu exam dawnah tlaivarin ka chhiar a, a zawngchhang chi loh khawp mai :)

Keimah thingtlangpa - Darrokima
Darrokima thuziak ngaisangtu i nih lem loh chuan ka suggest hauh lo che a, mahse he pa thuziak vawikhat chhiar tawh zawngchhang zui lo hi ka la hre lo! Article hmun hrang hranga a ziah tawh khawnkhawmna a ni a, chhiar hnu pawh i nei nual tawh maithei. Keichu ka chhiar hnu pawh ni mahse, han chhiar nawn leh ila, ka la nuihpui tlawrh tlawrh thei tho. Chutihrualin, he lehkhabu ka chhiar atang hian fiamthu chauh lo pawh a ziakthiam tih kan hre ve leh hnuhnawh a. Lengzemah pawh hian a thuziak a awm chuan ka keu nghal chat zel :) He lehkhabu chhiar hi inchhirna tur pakhatmah a awm love ;)

Tin, tunah hian Dr. C Nunthara lehlin, Jerusalem Countdown ka chhiar mek a, a ngaihnawm chho khawp mai. Chuan Zoram Vartian (Lalhruaitluanga Ralte) leh Ground works for tribal theology in the Mizo context (mi hrang hrang ziah lakkhawm, Rev Rosiamliana Tochhawng, Rev K Lalrinmawia leh Rev LH Rawsea te edit) pawh ka chhiar hun nghakin ka lehkhabu dahna kilah an awm ve ran mai :)