Kumin Krismas

Nikum lam Krismas leh kumthar ka hmang ho lutuk khan hun rei tak chhung rilru nuam lovin min siam a. Vanneihthlak takin December thla chhuak Kristian Thalai-ah khan 'Krismas 2008 : Mi dang tan', Rev K Lungmuana ziak ka chhiar fuh hlauh mai. Chumi behchhan chuan, "Kumin chu a tha thei ang berin ka hmang ve tawh ang", tiin ka rilru kan siam ve ngawt a, mahse engtiang chiah a hmalak tur nge tih lam ka bo chiang hle thung.

Mahse tawngtaina chhang thintu Pathian a hun takah a rawn che leh ta chat mai le!

December ni 8 zan khan kum danga kan lo tih thin angin, thalai hovin carol kan nei leh a. Zankhuain Guwahati-a Mizo chhungkaw awmte tlawhkualin, a remchan dan ang zelin thawhlawm kan khawn a, member pawh mi 60 vel bawr zet an thawkchhuak thei. Heta kan pawisa hmuhte hi Guwahati-a kan Mizo pui, sum leh pai lama harsa zual deuh te tanpui nan a tih a ni. Kum danga ka lo tel ve deuh ziah avang leh ka buai ve deuh avangin tun kum chu ka tel hman ta lo.

Tichuan ni 24, Pathianni inkhawm banah kan thalai hruaitute nen, mi pariat thawkchhuakin tanpuina hi kan sem kual a. Veng kilkhawr tak tak a awm an nih hlawm avangin a hautak hle a, a thente phei chu thui tak tak ke a kal ngai te a ni a, a hahthlakin hun a duh rei khawp mai. Kan kalna zawng zawng hi chipchiarin ka ziak vek lovang a, mahse ka rilru khawih zual pahnih kan tarlang ve ang e.

A pakhatna chu - Assam police constable pensioner te chhung an ni a. Harsa a sawi tur phei zawng an nilo, mahse hna ropui tak thawh an nei. Chu chu an awmna venga hnamdang ringtu leh ringtharte zinga an mahni sum leh pai seng a an rawngbawlna hi a ni. Kan va tlawh tlai pawh hian an inah hnamdang mi sawm vel bawr an lo awm a, an Krismas hman dan tur te an lo rel ve a. Inkawm khawmna hun tha tak neih pahin, a in neitupa chuan kan thalai rawngbawlna te a tlangpui an hrilh ve bawk a. Nakum lama neih tan tur Assamese service-a lo tel phei vek an tum thute an sawi chuan min tihlim tlang khawp mai. Tichuan tawngtaina hun te kan hman zawhah, Krismas chibaite inbukin kan kalsan leh ta a. Anni ang chhungkua hi engzat tak awm ang maw?

A pahnihna chu - Kan Biak In a inkhawm taima ber pawl pitar kan tlawh chungchang hi a ni. Engtik atanga Assam rama awm nge a nih a, tute nge a chhungte tih pawh ka hre chuang lo. Vai pasal a nei thin a, a thihsan tawh ni awmin an sawi. A in ka han hmu chiah chu hnuk a ulh thei mai dawn alawm. A chung rangva, a bang dap, sawi deuh bi bei, thlipui na vak lo pawh han tleh sela, tlu mai thei tur hi a ni a. Inchhung lam chu choka angreng deuh hi a lo in ping dang ve a, lehlamah chuan khum pahnih, thuthleng leh dawhkan pakhat ve ve a awm a, a khat chu a ni deuh der mai. Ka rilru ti na em em tu chu, khawpuia awm ve siin kawlphetha (electric connection) an nei lo!! Khawnvar ung ve tawh tak pakhat hi dawhkanah chuan a lo in chhi ve tang tang a. "Thalai ho hi inlengah te pawh sawm che u ka chak thin lutuk a, mahse ka in hi a chhe lutuk a...", an tih te chuan sawi tur a vang duh ngei mai. Ka thiante sawi dan chuan fapa pahnih, fel vak lo a nei a ni awm e.

(Hei hi chu duhtawk phawt ang. A sei lutuk palh ang e).

Ni 27 khan Pathianin fehchhuahna hun tha min siam sak leh hlauh bawk. Assam Mission Field-a thawktute hmalakna bawhzuiin, Bhairabkunda-ah Free Medical Camp kan han nei a, mi za chuang hret en in, damdawi tam tham tak kan sem nghal bawk. Field Secretary Pu Rinmawia (Rev K Lalrinmawia) hovin kan thawkchhuak a, medical team lam hi kan hotu deuh ber chu U Mami (Dr Esther-i, MD, Sr. Resident, Dept. of O&G, NEIGRIHMS, Shillong) a ni. Kan zavaiin mi sawm leh pathum kan kal.

(Bhairabkunda hi chipchiar zawk a hre duh tan - hetah, hetah leh hetah hian a en theih e).

Kan thawkchhuak hma fia fia bawk a, thingpui no thum leh puri pasarih ei hnuah pawh a khat tawkin mumang kan la inneih chhawk deuh zak zak reng tho.


Kan camp va neihna hi ramthar mission in a din leh a enkawl 'St. Paul's School' a ni a. A compound chhung an enkawl uluk bawk a, a fai tha hle.




A remchang lai apianga thlalak zel hi kan thil ngaihpawimawh ber te zinga mi a la ni ta cheu anih hi!!


Hna thawk tha thei tur chuan ei leh in lam tih hmasak phawt a ngai. An phuihnam leh englo te te han tui zia mai chu(h)!!


Border area tih takah hnam chitin chitang inchawhpawlh an ni a, Hindi leh Assamase tak ngial pawh a biak theih mang loh an awm nual. A buaithlak duh khawp mai. Tin, Zoram lam thingtlang aiin vairam thingtlang hi an changkang lo ve leh chhawng deuhin ka hria. Mahni kum zat sawi dik chat chat thei kha mi tlem te chauh an ni.




Kan zavaiin. A hmet tupa hian kan driver a lo cut daih anih hi.


Tlai dar 4 vel bawrah kan zo thei hram. Tichuan sight seeing hun reilote kan nei a, Arunachal leh Bhutan kan han zin zuai. A khaw bul lawkah hian Dhansiri lui a awm a, he lui a lei dinglam (a hnuai chiah a mi) hi Arunachal Pradesh, a veilam (a hnuai leh) hi Bhutan.



Indo-Bhutan border check gate. Bhutan sipai duty ho hi thla an lakpui theih miah loh, a rukte a lak sak tum pawhin an lo bi bo hman zel.


Bhutan-a luh dawn chuan he mat, damdawi a chiahah hian pheikhawk hnuai tah fai zel a ngai.


Bhutanese thlalakpui tur kan hmuh chhun chu khawlai a zurui chiah.


Assam Synod Mission Field hi kumin a hawn chauh kha niin, tun tuma ka thawhchhuahna hi a vawikhatna a ni a. Hetiang ang hun pawimawha tel thei tura hriselna leh hun tha Pathianin min siam sak hi vannei ka inti hle.

E, taka, kan Krismas ruai thlalak hi intihtheihna pawh nichuang lovin kan dah tel mai mai ang e.