Saturday, December 20, 2008

Krismas - Vairamah

Zoram lamah chhungte leh thenrualthate Krismas hmang tura an inbuatsaih luih luih laiin, kei ve chu vairamah, Krismas hi tu piancham nge a nih tih pawh hre mumal lo vaiho karah ka la inpal khu ve laih laih a. A happening lo thei tiah tiah khawp mai. Khua a vawt ve ta deuh e, tih mai loh chu engmah danglamna ka la hre lo. Nge danglam ka tum nasa lutuk zawk? Ka hrethiam teh nuai love.

Tun kum hi vairama ka awm kum sarihna chiah a ni ve ta. Chu kum sarih chhung chuan vawihnih chiah Krismas hmang turin ka la haw; vawinga ngawt vairamah Krismas ka hmang ve tawh tihna anih chu. Nuam em em a sawi tur chu ni lem lo mahse ka hmang tha thei phian. Mak ve deuh chu wine shop tlep deuh tuarna lamah hian in chakna ka nei khat khawp, mahse total prohibition awmna lamah khian a to a tovin ruih ka tum phet zel.

Exam-in min hmuah deuh fur avangin kan hostel-a Kristian awm te pawh kum dang angin thawm kan nei thei tlat lo. Kan junior thenkhat phei chuan ni 24 leh 26 ah te exam an nei hem dawn mawle! Ringlo mite rorelna hnuaia awm kan nih hrih miau avangin phun nawi lova tawrh tlawk tlawk a ngai anih hi maw. Kum danga kan tih thin angin inchhungah arsi leh Krismas tree kan han siam ve leh a. Chubakah chuan, kar hmasa khan hostel pumpui vawksa tuihnai tak dinner-ah kan buatsaih sak tawh bawk.

A sawi deuh hlek a tar hi a mawi zawk, kan tih vang pawh ni chuang lova sawi ve satliah a ni.

Tunlai chu Assam hmun hrang hrangah ar pul hri (bird flu) a len avangin arsa leh artui lei tur a vang khawp mai. Hei hian nasa takin harsatna min thlen mek. Nitin a vawksa han ei ngawt chu rilru a nuam chiah si lo. Bawngsa lah a leina a hla bawk si. Kelsa tui ka ti bawk si lo. Sangha han ei ve lah hi ka dawhheihna hian a daih meuh thin bawk si lo, buaithlak tak a ni. Mahse vanneihthlak takin kan hostel bul lawkah hian sangha tin lei tur a lo awm ve a. Zoram lama hnatlang chawhmeh siam dan style-in, dal kanah kan han thlak pawp a. Chu chu chaw khawrh vum thar, a lai taka hai khuarah kan han chhung lut a, enghelh nei hlek lovin kan han hai chim hem hem thin mai chu(h), a ei hnem theih al al thin khawp mai!

Ei leh in sawi takah chuan, hmanni deuh khan Paltan Bazar-a Shillong Hotel-ah chaw kan va ei a. An menu chu kan thlir vang vang a, "Dohsniang...Umm, ka hria. Khasi tawngin vawksa tihna. Baksha??!! Ka bo khawp mai. Eng tawng nge ni ang aw...", ti a ka lo ngaihtuah neuh neuh lai chuan a dawr nghaktu pakhat chuan, "Ka pu, kya khaiga? Baksha?", a rawn ti lauh lauh mai chu, nuih a za duh angreng khawp mai. 'Baksha'='Vawksa' an tihna lek chu lo niin. Mak thin mange!

Tihdanglamna nasa tak ka dawng thut te anih lem loh chuan, Krismas zawh hma chu ka post tawh loh hmel. Chuvangin ka blog rawn tlawh thin tute zawng zawng in zavaiin Krismas chibai vek ule.

5 comments:

DayDreamBeliever said...

Oho Hotupa chu vairam lamah maw? Ni e, a tul miau sia, chhel tak khan in lo tuar poh aniang chu; haw loh manah an zah chem chem tur khopa tha khan exam chu i lo pe dawn nia o.

"Mak ve deuh chu wine shop tlep deuh tuarna lamah hian in chakna ka nei khat khawp, mahse total prohibition awmna lamah khian a to a tovin ruih ka tum phet zel." Mak tiro, dik khop mai.

I post ka chhiar a, ka ril a ti tam :) Here's wishing you a merry and blessed Christmas. And all the very best for your upcoming exams.

Mizohican said...

hehehe bird flu nen Masi i lo hmang dawn a ni maw? :D Keini pawh hei Vairamah kan Masi dawn a, mahse a nuam ve khawp mai, han tum tak zet chuan :) chuan thil te te pawh a tlawm bik khilam ai in :D

Sekibuhchhuak said...

Ani maw, Engpawhnise, tha deuh khan han ekzam phawt mai la :-) Masi hlawk tak i hmang chu ani der ang :-)

A khaih a, chutia kan Hotuten ruih talh te in la tum tlat chuan avan buaithlak awm ve aw...! :-D

illusionaire chu van ngeiawm ve a..ani pawh terrorist ho nen, bomb puak tihvel nen an hmang ho ve dawn tho siah (hehehe)Fiamthu..ani e oouh :-)

Masi chu hlim tak leh Masi kan hman chhan hre rengin i hman ka duhsak a che !:-)

wonderboy said...

Bird flu a leng chu i vanneihpui thung alawm, nilo se chuan i khai 'kâk' tlaivar leh thrak awm sia :D

luliana said...

@DDB : Thanx again...hei ka ip tang tang a thlemna ka pumpelh famkim tep tawh e :D

@illusionaire : hihi...vawksa kan ei tawk tawk reng mai, arsa lei tur awm loh aiah...vairam a hmang rau rauah nang ai chuan ka luck deuh zawk ang a :P Nuam deuhin auh..

@Seki : ka lawm e...nang pawh hriselna tha nen kumthar lam a i hnathawh lai i thawh zel theih nan duhsakna ka hlan a che... :) illusionaire chu an terrorist man khan a lo hria a ni awm e (fiamthu) :P

@wonder : eh eh...tu zawk nge khai kak thin? :P

Post a Comment