Making a Mizo porn

(A hnuaia thu fahrah leh satliah ve tak hi a ziaktupa ang mai a thutak pailo a ni a, phalna la hmasa lova lo belhchian ve ngawt a rem lo. Thutak khuk a khukpui an lo awm anih vaih chuan, thutak khukin an lo khu satliah ve mai a ni anga, an chungah na takin action lak a ni lovang. He thuziak fahrah leh satliah ve tak hi tha ti tu mi pathum tal an awm anih ngai chuan, a lawm nan vawkpui rai lai vawi hnih leh a chanve kan hawlh ngek tuar tuar ang. Tin, kum tlinglo tan a ri a chhiar chhuah phal a ni lo bawk).

A hmun – Location
Sap ram lama an channa thin swimming pool thianghlim tak sir leh penthouse changkang taka chan ve a rem lo, swimming pool thianghlim tak leh penthouse changkang tak kan rama a awm ve miau loh avangin. Kan neih ve phak tawk leh kan budget in a a tlin tawk, mi fate'n stem cell research leh nuclear power an buaipui luih luih laia, mautam avanga tam lek lek te hi chuan mi inhnuaiah, a in neitute hriat loh laiin thawm dim thei ang berin kan chang ve leh thawr mai dawn a ni.

A changtute – Starring
A changtunu tur hi a theih hram chuan a hminga celebrity, music video (gospel tiamin) pakhat tal lo siam ve tawh emaw, super model contest a first round paltlang zo lo emaw, mizo film-a a changtunu thiannu thiante zinga hausak hmel deuh a lo chang ve tawh tal a ni tur a ni. Hetiang ang mi hi kan hmu zo lo anih chuan, veng tlabirh ve deuh a Shakira hla pakhat tal hria kan zawng mai ang.

A changtupa tur hi chu a remchang apiang a ni mai, a hmel a lan ve dawn chuan loh avangin. “Dulkiar hian mihring min ti sexy zual”, tih hi tun thlenga science thiamna hmanga finfiah a la nih loh avangin dulkiar te chu duhsak bik an ni lovang. Tin, Kohhran lehkha thil tel te pawh a thil tel lo te nen angkhat veka en an ni dawn bawk a ni.

Hlawh chungchang
A changtunu hi top-up cheng sawmruk (Rs. 60) man a lungawi thei tur a beisei a ni. A beitham a ti deuh anih chuan sms pack cheng sawm (Rs. 10) man belh sak theih a ni ang. Chuta a la lungawi lo anih chuan bike in vawikhat Rangvamual leh Phunchawng fanpui a ni anga, a mawng tih er theih chintawk erawh bituk sak a ni ang. Heti chung pawh a a la lungawi theihloh cheu chuan, “Hmelchhe nu” emaw, “Zawngi” tih pahin kan beng thle sawk anga, pension nei lovin kan ban zui nghal ang.

A changtupa ve thung hi chu ama zei vang hrim hrim a celebrity nula theiah kan ngaih sak hmiah anga, a lungawi ve tawk hle tura ngaih a ni. A lo lungawi loh tak leh Mizo mipa zinga “englo” nei lian berah official takin kan puan der sak ang.

Tin, kap var lutuk tan dil buai ve tingtang a ngai lo, a ti Mizo lo thei tlat (ka ti lutuk em?!!).

Cameraman
Hei hi a awlsam zawngin, a changtute mawhphurhna ni mai sela. Mobile phone camera bak chu hman phal a ni lo.

Thehdarh dan tur
An chan zawh veleh a remchan dan ang angin kan release nghal mawlh mawlh anga, blue-tooth leh pen-drive-ah innghah bur a ni ang. Copyright dan bawhchhia a rilru chhe tak pu chunga sem darh an lo awm anih chuan, an chungah lawmthu kan sawi mawlh mawlh ang. Kohhran upa leh thalai hruaitu hlawhtling taka pechhawng theitute phei chu a bik taka lawmthu sawina lehkha thawn ngei ngei kan tum bawk dawn a ni.

Tlangkawmna
An chang zo anga, a darh leh hrep anga, an zak leh ngei bawk ang. Chutih hunah chuan ram pawn lama bi bo duh te chu anmahni senso liau liau a ni anga, thingtlang pilril leh ramhnuai lama bibo duh te erawh tanpui dan tur ngaihtuah a ni ang. A bikin a changtunu hi khawtlang tangrualin vengchhung atanga an hnawtchhuak anih chuan, MHIP leh Human Rights ho hnenah kan zualko sak bawk dawn a ni.