Kan hostel chaw

Thla khatah chaw man atan cheng zasarih chawi ziah ta la, i chaw dawn chu eitlak ta silo se, i lungawi thei a ngem? I lungawi thei anih chuan, mifel leh dawhthei tawpkhawk i nih vek loh pawhin, mipangngai chiah lo, mahni tan a pawi tur leh pawi lo tur pawh thliar hrang thiamlo i ni ngei ang.

Ni e, cheng zasarih chuan chaw tha lutuk ka beisei hran lo. Thla thum kalta thleng phei kha chuan cheng zaruk chauh kan chawi thin. An han tihsan hnu pawh hian hmasawnna engmah hmuh tur (‘taste’ tur a ni zawk mah mah maithei) a awm thlawt lo. Dailuah a dal ngaiin a la dal a, chaw a hum tam ngaiin a la tam a, arsa leh sangha ‘them’ lah a la len phah bawk hek lo. Mai kan, ban chuang si lo kar a alu thlan duk duk reng pawh hi a hneawm ve ta bawk e.

Kan hostel menu pawh hi a ropui hranpa ve hrim hrim asin. Thil variety lutuk chihnih (2) thlan tur a awm. Chungte chu – a ‘var’ leh a ‘eng’ te an ni. Chaw (buhfai) hi a ‘var’ a, a bak zawng chu a ‘eng’. Arsa a eng a, sangha a eng a, sa ei lo (vegetarian) ho tan a siam bik paneer pawh a eng a, bean leh antam te thleng hian zu han kang eng thiam a mawle.

Thianpa Francis-a (of Vety daktawr) tawngkam takin, kan hostel chaw hi chuan han tawngtai sak pawh hi a phu thlawt lo. A inthlahrun awm tlat. Han tawngtai ve pawh ni ila, ‘Kan taksa tan malsawmnaah lo chan tir ang che’, tih kha a ngai dawn sia, rinna chau deuh hlek keini ang tan chuan a ruk takin a awihawm loh duh thin khawp mai. A lehlamah chuan, thahnemngai tak a ka lo hlan ve ziah thin vang te pawh a ni mahna, ka taksa hian a la chhiatpui em em bik lo. Thil tha lo deuh erawh chu vawksa ka ei tam phah. Kan hostel bul lawkah hian lei theihin a awm reng bawk si a, a tha lo angreng khawp mai. ‘Medical student discount’ te an la pe ta deuh deuh a.

Ka lungawi loh nachhan ber chu hei hi a ni. Kan hostel-ah hian boarder 180 vel kan awm. Cheng zasarih theuh kan vawmkhawm chuan thla khatah cheng nuaikhat singhnih leh sangruk (Rs. 1,26,000) bawr vel a lut ang. Mess secretary lo ni tawh ka senior pakhatin a min hrilh dan chuan, “Cheng singkua (90,000) hi chuan pangngai takin thla khat chhung chu a ‘run’ theih”, a ti. A hun lai kha chuan a ziaawm reng bawk a. Mahse tun a mi hma chhiah khan thla kua (9) a ‘run’ hnu in bike thar a lei hem mai. Chumi hma leh deuh a mi chuan thla li (4) a ‘run’ a, fridge thar a lei ve bawk. Mahse an zak lem lo. Mess secretary nih hi an inchuh viau thin reng bawk a.

Kan ramah hian eirukna (corruption) kan zir tanna hi a level a lo hniam angreng khawp mai, tih te chu riltam teuh chung chuan ka ngaihtuah ta vel mai mai a.

Tam a hnem lo ve chiang ania aw!!

Kan mess hall

My refuge!! Kan hostel bul vawksa zawrhna