Khawchhak excursion

Kum 2006 December thla khan mi vanduaina a zarah vanneihthlak takin (ka tawng lo haw lo sela) khawchhak lam, Burma ramri depah zinna hun tha tak mai ka nei hlauh mai a. Ka pian hnu lam a ka thil la hmuh ngai loh leh ka hmuh leh kher tawh loh tur tam tak ka han hmuh phah a, a nuamin a ropui danglam hle. Motor khalhtu tur an awm loh avangin ka roommate nen Guwahati atangin chawl maih lovin Vaphai kan thleng thak a, taksa chuan a tuar ve deuh. Ni ruk zet kan thang chhung khan zan hnih chiah khumah kan mu thei a. Amaherawhchu, thian rual zin kan ni bawk a, hah leh chauh pawh kan hre hman meuh lo. Kan zin kawng leh hun hman dan te chu dah tha ta rih ila, ka thil hmuh leh hriat tlem ka han ziak lang ve dawn a ni. Mahse historian ka nih loh avangin keima khaw thlirna tlang atangin ka hriat hriat ka ziak ve mawlh mawlh mai dawn a ni.

Tan tlang - Hei hi kan pi leh pu ten ramhuai ho khawpui, an hotupa ber Lalchungnunga hova an chenna niin an ngai a. Tlang lian ve tak, ral khat atang pawh a langsar tak mai a ni. A san zawng hi feet 6356 a ni. Chal lam leh chhip lam a nei a, a tlangpuiin a chal lam atangin an lawn a, a chhip lam atangin an lo chhuk leh thin. Engemaw chen chu motor pawhin a lawn theih nghe nghe. Zing chaw ei khamah kan chhuak tan a, a chal lampang a lawn tanin muangchangin kan kal beuh beuh a, a remchanglai apiangah thla kan la zel bawk. Boruak a thengthaw nuamin khaw hawi a nuam hle.

A lawn hrim hrim pawh hmun hnih khat tih loh chu khirh em em a awm hran lo. Ka chiang chiah ta lo, dar 11 vel bawr niin ka hria a chhip kan thlen kha. A chhip han tihah a zawl deuh durh a, thingkung pawh a la tamin daihlim han hahchawlh maina tur pawh nuam tak tak a awm. Kan kal lai hian Kohhran pawl pakhatin (an hming chu sawi lo mai ila) chunglampang hriattirna kan dawng e, tiin thing engemaw zat an kih bakah lei an lo lai phut durh mai a. Engmah chu ka sawi lem chuang lo na a, ka rilru te te chuan Forest department lamin an hre ve awm tho si a, a venhim lam a hmalakna a awm lo chu mak ka ti angreng hle. Tan tlang hi lawn chhuah nan darkar 6 vel kan hmang ta in ka hria. Hmanhmawh deuh chuan a aia rang pawhin a lawn chhuah theih ngei ang.

Fiara tui - Fiara chanchin hi chu sawi ngai lovah han ngai ta phawt ila. Fiara tui chungchangah hian Vaphai leh Farkawn khua te inkarah inhnialna a awm avangin ziah fimkhur a ngai viau ang. Tuna ka ziah tur hi chu Tan tlang a awm, Vaphai khaw bul a awm zawk kha a ni tih han sawi hmasa ta ila a tha awm e. Han sawifiah ngaihna vak pawh ka hre lo. A hnar hi hmuh theih a ni lova, lungpui lian tak hnuai atangin a rawn luang chhuak a. A kua hi a len zawng chu rasagula bur ruak a tui thal nuam tawk vel a ni. Vawi khat kal manah tiin kan inbual nghe nghe. A vawh chu a vawt ngat ngat khawp mai a, mahse inbual man a awm khawp in ka hria. Aizawl lam a hawn turin bottle ruak kan hmuh ang ang kan thun khat a, mahse ka chhungten min lo ngaihhlut sak lem lo kha chu ka rilru a na ve deuh.

Thasiama seno neihna - Thasiama chanchin hi sawi duh viau pawh ni ila, sawi tur em em ka hre lo. Tlang bawk te reuh te, a chhip zawl, a pang awih tak a ni. Kawng sial lo phei sela chuan ka lawn theilo chiang ngawt ang. A chhip zawl hi a dung feet 20 vel emaw a nih ka ring a. A vang erawh chu zim te a ni a, a lai takah a rek bawk. Vaphai khaw pitar pakhatin an tet lai a a chhip zawl a an inkawibah thin thu min hrilh a. A thu sawi atanga chhut chuan muang changin a chim (erode) ni ngeiin a rin theih. Mahse tunah chuan a chhip hi cement a plaster a ni tawh a, railing pawh siam anih tawh avangin he hmun, hnam anga kan hmun pawimawh tak hian min ralsan lo turah i ngai phawt mai teh ang. Hman deuh khan pawl kalsual pakhatin a hnuaiah hian rohlu tam tham tak a awm e, tiin laih chhiat an tum a. Mahse an khap dai thei hram a ni awm e. Hetiang ang rinna at thlak tak tak, kan history a hmun pawimawh suasam duh tu te lak ata hi kan ven that tlat a pawimawh khawp mai. Thasiama seno neihna atang hian Tan tlang hi a hmuhnawm hle a ni tih kan zep tel lawk ange. Tin, kan thianpa pakhat chu Thasiam seno neihna nilovin 'Thansiama sakawr no neihna' ah a lo kal bik a ni awm e.

Lurh tlang - Burma ram chhung a awm a ni ta in ka hria, a hmun a kal thlen ngei pawh a chakawm khawm mai. Lurh tlang hi pipute chuan Chawngtinleri puan banna niin an ngai. A bak chu sawi tur ka nil.

Maurawkela tui - Maurawkela hi tunge a nih chu ka hria a, mahse ka sawi thui thei lem lo. Maurawkela tui hi kawngpui sir mai a awm anih avangin hmuh tlak a awm tawh meuh lo. Tuikhur rauhsan tawh hi a ang ber in ka hria. Kawng an laih dawn hian lo thlir thui deuh nisela chuan hetiang kan Mizo history a hmun hmingthang tak hi a vawnhim dan kawng chu a awm ngei ang le.

Lianchhiari lunglen tlang - Dungtlang khua a awm Lianchhiari lunglen tlang hi Zofate zingah chuan hre lo kan awm tlem viau ang. Chuvang chuan a thawnthu lam kha chu lut lo law law mai ila. Vaphai atanga kan chhuah tlai deuh avangin Dungtlang kan thlen meuh chuan khua a lo thim ti tih tawh a, thlalak pawh duh angin a fiah tawh lo. Thlalak fiah lo ai mah chuan he hmun atang a khua duh angin a thlir theih tawh loh kha ui tak te in ka ui. Hman deuh khan a lung hmawr hi a khi a, chetsual a hlauhawm avangin an chhu thla a, a lang bul deuh hmuih tawh. Thlifim han dawn deuh heuh heuh chu a thawven thlakin rilru sual put duhna thinlung a chhem kiang deuh sawng sawngin ka han hriat tlat pek chu.

A tlangpuithu chuan kan khawchhak zin hi nuam ka ti lutuk ringawt. Kan pipute sulhnu leh Mizo thawnthu a hmun tam tak, a thu ringawt a ka lo hriat thin chu a tak ngeiin ka han hmu a. Hunin min daih loh bakah kan zin chhan ki nen han len vah vak kha a inhmeh chiah loh avangin a lehpek awm theih dan tur ringawt rilruah a awm a. Duhthusamah phei chuan Farkawn thleng rak a kal a, ram riak ngei a thawhchhuah a chakawm khawp mai.

Tan tlang chhip a signboard intar

Thasiama se no neihna, a hnunglam khi tan tlang pang

Tan tlang chhipah

Vaphai khua a ka 'fans' te