Hna leh a kaihhnawih - I

Khai a! Blog ka update khat lutuk a pu Zoramthanga lal a lo hun leh tep tawh alawm le!

Mahni tawk te te in kan han buai ve nak nak a. Chumi karah chuan thil ho te te, hlimawm leh nuihzathlak bawk si lo awm ve te hian nun hi a lo ti nuam a ni.

Vawikhat chu pitar, kum 90 chuang tawh hi casualty-ah an rawn hruai a. "Ka pi, Durtlang-ah hian tun hma in i awm tawh ngai em?" ti a kan zawh chuan, "Aw, awm tawh e. Pi Puii te hunlai khan ka TB a, rei fe ka awm alawm," zu han ti daih a. "Chumi hnu chuan vawikhat mah i rawn kal leh lo a maw?" "Kal love, chumi hnu a damdawiin ka vawikhat awm leh na tur anih hi." A hrisel al al khawp mai.

Naute thla 11 mi inguinal hernia (til a ril tla) kan zai dawn a. "Inzai hma darkar 6 chhung engmah ei tur lo pe lovang che," ti a a nu kan hrilh lawm lawm hnu pawhin hnute a lo hnek tir hram. "Eitur in ti ringawt a, a in lam in sawi tel si lova...." Ni e, kan thiam loh liau liau, kan lo sawi chipchiar tawk lo a ni. A nu ber chu a nuihza ber berah a la tang zui lehnghal. Chaw ei loh tur, tih ringawt chuan kuhva ei theih emaw ti tawk lah bo hek lo! E taka, til a ril tla hi hmeichhia in an neih chuan, ....bianga ril tla an ti (eh...ka phuahchawp)

Kum upa lam hi dawhtheih an ngai thin khawp mai. Putar pakhat pawh a damloh tan dan kan zawt a. "A bul te atangin kan sawi anga. Buai hma lawk kum 196......" A sawi zawh meuh chuan a tir lam ka lo theihnghilh then leh der tawh. Buaithlak thin khawp mai.

Thingtlang nu pakhatin a fapa zu duh ve tak hi a rawn hruai a. "Ka pu, ka fapa hi a pumpui a anser nasa lutuk a...." Engnge, mi ulcer hresual ve te!

Natna chungchang a mihring rilru put hmang hrim hrim pawh hi a lo in ang lo khawp mai. Pa pakhat chaw kawng pan biopsy result a lo chhuak a. Kan u pakhat, thu leh hla nei tam lem lo tak chuan, "I cancer," an ti thawr ringawt a. A damlo lah chuan a thenawmpa melh pahin, "Kha, ka tih reng kha..."

Kal a lung awm, enkawl loh avanga kal chhe tawh chronic renal failure nei damlo pakhat pawh hi a khat tawkin a rawn lang ve reng a. Renal transplant (kal thlak) turin kan refer a, mahse chhungkaw lam harsatna avangin an kal thei bawk si lo. A natna awmzia chiangkuang tak a kan hrilhfiah hnu pawhin vei lutuk awm pawhin a lang ngai lem lo. A hrethiam pha lo nge chhandamna lamah a chiang lutuk zawk pawh ka hre bik lo. Hmanni deuh khan a tai a nat avangin a rawn kal leh a. Kan han enchian chuan a phing bulah lung lian vak lo hi a lo tang a. "Chhut keh a ngai, anih loh chuan na a siam reng dawn," tiin kan han hrilhfiah a. "Admit ka ngai dawn tihna em ni? Awm rei hman ka ni lo ania. VC inthlan hma a ka chhuah leh loh chuan kan vengah kan party an buai ani mai." A nunna derthawng tawh takin a rilru a ti hniam lem lo hi keini a enkawl tute tan chuan a lawmawm letling zawk!

A dang pawh a la tam. Nidangah....

Hman leh tun

He thlalak hi facebook-ah te chuan in lo hmu tawh maithei. A la hmu ve lo tan helamah kan post mai mai ang e. Thlalak pahnih inkarah hian kum sawm vel chu a tla mahna...


Keichu ka rin ai daihin an danglam nasa lo. An chaw ei a tui loh thin em vang te pawh a ni mahna!

2011

Kum a thar...leh ta phawt chu ania! A hming a hna chhete han thawh ve takah chuan blog post lam inthlahdah a awl kher mai. Mahse tun kumtharah hi chuan regular ve leh deuh tawh ka tum. Thei ngei turin ka in seh ruh ve nasa ania. Khaw vawt lutuk hi han reh deuh bawk sela.



Thil ho angreng deuh pakhat. Kan dawr luah tu pakhat hian kum chanve aia rei dawr luah man a ba tawh. NLUP a dawn hun hun a pek tlak min tiam ve a. NLUP chu an sem ta ngei, mahse cheng 20,000 lekin an sem si. A rilru a buai ve khawp ang le. Tih loh aia ti ve mai mai an ang.

Naute tak tak!

(A human fetus at 8 weeks)

A chhul a pai lovin a chi kawngah nau a pai a, a thanlenna tur a Pathian duan anih miau loh avangin a puak keh ta (medical term chuan ruptured ectopic pregnancy an ti a, emergency a zai nghal an ngai thin). Hetiangah hian naute (fetus) hi him pial a hmuh tur a vang khawp mai.

Ka phone camera a lak anih avangin a fiah lutuk lo.

Internship Diaries - Part I

Internship ka tih lai a ka experience tlem a zawng....

• A tan tir lamah khan kan han bo ve haih haih khawp a. Khawsik enna 'thermometer' kha an lo hmuam tir ngai reng reng lo chu niin. Hre ve hek lo, mi chi hrang hrang zakhnuaia an hawlh rawn luai luai kha putar pakhat ka hmuam tir ve tat. A hre chhuak zui lem lova ka lawm khawp mai.

• Vawikhat chu pitar kum 86 mi hi casualty-ah an rawn hruai a. An harsatna zualpui kan in zawh fel hnu chuan a khaw hmuh a la fiah that leh that loh kan zawt a. A rawn kalpuitu zinga pakhat chuan, "A, a la fiah tha thawkhat aniang, Zuma hi a khel peih ve riau a," tiin min chhang a. Khel ve satliah mai turah kan ngai ngawt a, mahse a lo ni lo nasa mai. "Ka pi, Zuma chu eng level nge i thlen theih?" ti a kan zawh chuan, "Ka khel chhuak vek thei," tiin min chhang. Tun thleng hian dangdai ka la ti.
  

• Rilru lam harsatna neih avanga na der, an chhungten casualty-a an rawn hruai chuk chuk hi an awm ve nual thin. Hmeichhia an ni tlangpui. Pumna, taksa khawng, thaw hah tih vel te hi an rawn chhuanlam thin. Mahse han enchian deuh a, han kawm chian deuh chuan a nihna tak hi a rawn langchhuak ve leh mai thin bawk. Nula pakhat, emergency tawk a an rawn hruai kha chu a frank ve angreng khawp mai. "I engnge na?" ti a kan zawh chuan, "Ka rilru," tiin min chhang keuh.

• Kan pu pakhat hi an haihawt ve mai mai khawp a. Vawikhat chu vai putar, phunchiar zet mai, ni nga lai damdawiin a awm tawh hi a chhuah (discharge) a. "Khum kan indaih bawk silova, nang chu zia lam i pan tawh tho bawk a, chhuak tawh mai rawh aw," tiin a thlah thlap a. Chu vai putar chu a lo phakar ve phian mai a, a chhuak thla chu haw ta mailo chuan OPD lamah a hming a lo zuk ziak lut ve leh a. A chhuahtu kan pu haihawt lutuk chuan a lo theihnghilh hman chek aniang chu. Nakin deuhah chuan nurse zirlai pahnih hian chu vai putar chu an rawn kai lut leh a. Doctor lehkha kan en chuan a chhuahtu kan pu kut ziak tho a lo ni si. Phone a kan zuk zawh chian chuan nuih uar uar pahin, "Ka lo hre leh tawh hleinem, lo admit leh phawt mai rawh u....".

• He kan pu vek hi vawikhat leh pawh department dang damlo refer, cabin a awm a va en a. Darkar chanve chuang zet a va awm a. Thingpui hang a in bakah kuhva ei pahin a va ti ti hrep a ni awm e. OPD lama a rawn let leh hnu chuan cabin a nurse duty chuan intercom hmangin a rawn phone leh a. A kal chhan ber a lo va tih theihnghilh chu niin. "In pu kha a lo let leh a ngai ania, damlo treatment a siam reng reng hleinem."

Ka ngaihtuah peih tawh hrih lo, duhtawk phawt mai ang. Nidanga chhunzawmah ti leh phawt mai ang.

B-l-u-e

Tawngtai damna leh damdawi

Vawiin chu RTPA te damdawi dawr a ka thut laiin pa pakhat hi a lo kal a.

"Ka pu, chloramphenicol in nei em?"

"Aw, nei e. Strip khat em ni i duh?"

"Ni lo, mum thum chauh ka duh".

"Mum thum a? Chloramphenicol mum thum lek eiin awmzia a nei hleinem. A lo berah kar khat emaw tal i ei a ngai asin".

"Min chawh tu in mum thum chauh ei rawh a ti sia".

"Ka va awih lo. Tunge i doctor rawn chu a hming?"

"Doctor a ni lo, tawngtai dam thei a nia".

Hahthlak...

Kar hmasa khan casualty-a ka duty laiin hetiang deuh bawk hi ka lo tawng tawh bawk.

"Damdawi ei lai i nei em?"

"Ei lai chu ka nei chiah lova, mahse nikhat danah ka in chiu tir thin".

"Engnge i in chiuna damdawi chu a hming?"

"Chu pawh ka hre chuang lo. A tui hnang deuh, dum lampang ania".

"Tu chawh nge?"

"Kan veng a mi, tawngtai dam thei".

Tawngtai dam theihna thilthlawnpek dawng zawng zawng khan hei hi khawngaih takin lo hre teh u. Mahni hna theuh hi rinawm takin i thawk ang u. Doctor ten an damlo te tawngtai dam kher an tum loh ang bawk hian, nangni pawhin a damdawi lam hi chu lo chawh tawh lo hram teh u.

A thu hrimin tawngtai dam thei ni ve si, damdawi hman ngai leh tlat si te chu...a thlarau dawn san loh thlak em mai!

Phorona rapthlak leh Kung Fu Panda

Nikhua ka hriat rual rual chuan ka taksa pumpui chu a sa hut hut a, chhunglam atanga puak keh mai thei tur a ka inngaih lai chuan, ka pawn lam erawh a ro char vek thung lawi si. Men kan tum a, ka theilo. A eng lutuk, a sa rapthlak bawk si. Kan dap kual vel a, mahse engmah dap fuh tur pawh a awm lo.

Mak ti em em a ka in ngaihtuah lai chuan aw thum lutuk lo hian, "Thil awmzia engmah i hre lo tiraw", hi a rawn ti a. Meng theilo mah ila aw ka hriatna lam chu kan hawi a, "Hrelo, engmah ka hre lo. A sa rapthlak bawk si, engnge ni thil awmzia?" tiin kan zawt a. Aw chuan rapthlak lutuk hian, "Ka Pathian nung hmingin pho rovin i awm mek a ni", a rawn ti leh ta dur dur mai a. Chutah zet zawng, sa hle mahse hlauh avangin ka khur nghal ta char char a. Ka eiruk awm ka hre bawk si lo. Eiruk chu sawiloh, eiru thei dinhmun a ka awm pawh ka la hre bawk si lo.

Mahse engmah ka sawi hma in aw bawk chuan min tawng khalh leh avangin ka rilru ngaihtuahna zawng zawng hre vek thei vantirkoh a ni tih ka hre ta a. "Hman a Assam Medical Council office-a mi i tham kha i la hria ang tiraw?" a rawn ti ta a. Kan inngaihtuah let a, a chiang ta khawp mai.

Khami tum kha kan senior pakhat lehkha tifel turin Assam Medical Council office-ah ka kal a. Registrar hmu tur khan ka hmaah mi an tam em avangin clerk chu cheng za thingpui in na tur ka lo pe pek a. Ka thil tih sual chu te hle mahse bawhchhiatna, phoro phu a lo ni reng mai. "Anih leh ka bawhchhiatna anga te lutuk ho pawh in phoro vek tihna em ni?", kan ti leh a. Aw chuan, "Tumah hmaih kan nei lo. Mizoram pum hi kan phoro a ni ber mai", tiin min chhang leh a.

Chutia mumang rapthlak lutuk ka man mek lai chuan ka nu hian, "Tho rawh, duty i tlai leh mai tur asin", tih pahin ka room bang chu a rawn beng ri dawt dawt a. Zawi muanga thawh pahin ka mumang rapthlak tak chu ka ngaihtuah zui neuh neuh a. "Phoro hun hi lo thleng tak tak pawh ni se a lungngaihthlak vak love, ka hnung dawn e mai. A thu hrimin phoro hmasak tur ho kan la vulh thau mek chauh a ni a si a", tih pahin ka insiam mawlh mawlh a.

.................................................

Phuah zawm dan tur ka hre tawh lo, duh tawk tawh mai ang.

Engmah hi a kal ding tak tak theilo tunlai chu. "Engnge i nunah thil thar awm?" ti ta se, ka chhanna tur chu, "Kan vawkpui in no a nei leh tawh", tih vel bak anih ka ring lo. Chutiang vel chu a ni e.

E taka, lungawi loh deuhna ka nei. Nula pakhatin ka thianpa hnenah, "Khawnge i thianpa kha?" a lo ti a. Ka thianpa in, "Tu ber maw?", ti a an zawh chian chuan, chu nula chuan, "Kha i thianpa KUNG FU PANDA ang deuh kha", zuk ti kher a mawle.

Kawi

Kawi hi hmuh tur a van tawh em avangin kan post ve mai mai ang e. He kawi hi a kawm a tha vak lova, a rah pawh a tha vak lo. Mahse a hrui hi chu a hrawl tha ve viau. Kan zosap missionary te zinga mi, Pu Daka tupa pawh hmanni deuh a Mizoram a rawn tlawh tumin a pa in kawi hi a rawn chah a, Aizawl leh a chheh velah hian hmuh mai tur a vang tawh viau a ni awm e. He kawi hi an rawn hre fuh hlauh a, a hawn thlak nual kha.

Pikchar kawleksawn - III

Tui ek dalah thlalak tlem a zawng. Ka post khat rem rem lutuk a blogger hman dan te ka lo theihnghilh then tawh vel mawle

He dawr a an thil zawrh hi a tlawm hlawm mai mai ania aw! Below MRP ani tawp mai!


Thlahrang chi hrang hrang an zuar dawn emaw ka tih laiin, kuhva khawr leh chana ro tih vel bak an lo nei bik chuang lova


Rit deuh deuh a load lak fo chuan...


Petrol pawh a hek duh khawp mai


Kohhran lian berin hetiang zawnga zirtirna an chhuah mai chuan a chi loh viau ang!


'Rei lo te' tih hi a mihring a zirin a danglam nasa mai si a, a buaithlak duh awm e.


Silchar pelh tawh hnu a kawng sir thingpui dawr. A subscribe leh subscribe loh zawh nachang ka lo hre lem lova...


No comments!! Eh....!!!

Ka tunlai khawvel

Tun tum chu ka thatchhiat vang a ni bik miah lo ania. Mahni tawk a ka buai ve thin em avangin online na hun ka neih khat bakah, hun awl ka neih ve deuh tum pawhin mut hahdam ka thlang zawk thin a. Blog update tur phei chuan rilru ka seng tha peih ngang thin lova; mahse hei, ka thil tawn leh hmuh te hi an ropui em a, ka rawn ti hram a ni e.

Beisei loh lutukin misual.com milar kanidari nen Mizoram House-ah kan inhmu hlauh mai. A hmu ve duh tan hei a thlalak pawh ka rawn dah tel e. Ama tawkah chuan a hmel hi a inhmeh ve angreng viau.




Tin, milar dang Pi Blek-i (blackmagicwoman) nen phone-ah kan inbe thin. 'Inbe thin' tih lemah kan khaw lama mi thil mamawh a nei a, kan va leisak zuai zuai kha. A lar zia ti lang chiang em em tu chu a thil ka leisak hi a hnuai a mi ang khuan ka thawn tawp a, an inah an va deliver sak thlap a ni awm e. Zawnglai a ni tawh silova a phone number hi ka thaichhe then ta mai. Han be ve ula chu ka ti viau, a aw a 'suas' ropui sia...


Kar hmasa lam khan Gauhati University-ah football tournament a awm a, inpuahchah lawkna awm miah lovin kan va tel ve leh ngawt a, a sim thlak leh pek hle. A home team GU ho nen ka intum a, hun tawp dawnah penalty kan hmu, ka pet lut nanga 2-1 in kan chak ta chuang lo. He inkhel hi ka tan chuan farewell match a lo ni reng a, a tawp kharna a ropui hran lo khawp mai. Kan zinga in fit ber leh tlan peih ber pawh a kap a in nawh avangin a khel tluan peih ta lo.